Односот спрема жената фатена во прељуба

8 Потоа Исус отиде на Маслиновата Гора. ² Следното утро, Тој повторно дојде во храмот. Сиот народ доаѓаше кај Него, а Тој, седејќи, ги поучуваше. ³ Вероучителите и фарисеите доведоа една жена што беше фатена во прељуба, па откако ја поставија насреде, ⁴ Му рекоа: „Учителе, оваа жена е фатена на дело како врши прељуба. ⁵ Во нашиот Закон Мојсеј заповедал таквите жени да бидат каменувани^[a]. Што велиш Ти?“ ⁶ Тие Му го рекоа ова на Исус за да видат што ќе стори, надевајќи се дека ќе има за што да Го обвинат. Исус се наведна и почна со прстот да пишува по земјата. ⁷ Но бидејќи тие упорно Го прашуваа, Тој се исправи и им рече: „Тој што меѓу сите вас е без грев, прв нека фрли камен на неа!“ ⁸ Потоа повторно се наведна и продолжи да пишува по земјата.

⁹ Кога обвинителите го слушнаа тоа, еден по еден почнаа да си заминуваат, на чело со старешините, се додека не останаа само Исус и жената, која стоеше на средината. ¹⁰ Исус се исправи и ја праша: „Жено, каде се луѓето што те обвинуваа? Никој ли не те осуди?“

¹¹ „Никој, Господине!“ - Му одговори таа. „Тогаш ни Јас не те осудувам; оди си и отсега не греши“ - и рече Исус.

Исус

- Светлина на светот ¹² Подоцна, Исус повторно им зборуваше на фарисеите: „Јас сум Светлината на светот! Секој што ќе биде Мој следбеник ќе ја има животодавната Светлина и никогаш нема да талка во темнина!“

¹³ Тогаш фарисеите Му рекоа: „Еве, сега Самиот сведочиш за Себе! Значи, Твоето сведоштво не е веродостојно!“

¹⁴ Исус им одговори: „И да сведочам Сам за Себе, тоа што го кажувам е веродостојно, затоа што Јас знам од каде дојдов и каде заминувам. А вие не знаете ниту од каде доаѓам, ниту каде заминувам. ¹⁵ Вие судите според човечки мерила, а Јас никого не судам. ¹⁶ А, и ако судам, Мојот суд е справедлив, бидејќи тоа не го правам Сам, туку заедно со Таткото што Ме испрати. ¹⁷ Во вашиот Закон стои запишано дека сведоштвото од двајца^[b] се смета за веродостојно. ¹⁸ Јас сведочам за Себе и Мојот Татко што Ме испрати сведочи за Мене.“

¹⁹ Тогаш тие Го прашаа: „Каде е Твојот Татко?“ Исус им одговори: „Ниту Мене Ме познавате, ниту Мојот Татко Го познавате! Кога би Ме знаеле Мене, би Го знаеле и Мојот Татко!“ ²⁰ Овие зборови Тој ги кажа кај ризницата^[c], додека поучуваше во храмот и никој не Го уапси, зашто се уште не беше дошол Неговиот час.

Кој е и што е Исус?

²¹ Потоа Исус повторно им се обрати и им рече: „Јас си заминувам, а вие ќе Ме барате, но ќе умрете со непростени гревови! Вие не можете да дојдете таму каде што Јас заминувам!“

²² Еврејските верски водачи си велеа: „Да не изврши самоубиство, штом вели: ,Вие не можете да дојдете таму каде што Јас заминувам!‘?“

²³ Исус им рече: „Вие му припаѓате на овој свет долу, а Јас доаѓам од горе. Вие сте од овој свет, а Јас не сум од овој свет. ²⁴ Затоа ви реков дека ќе умрете со непростени гревови. Ако не поверувате дека Јас Сум Тој што Сум - ќе умрете со непростени гревови!

²⁵ „Кој си Ти?“ - Го прашаа тие. Исус им одговори: „Што ви кажував од почетокот^[d]? ²⁶ Имам многу работи за вас да зборувам и за многу нешта да ве судам, но нема да го сторам тоа. Оној што Ме испрати е вистинит и Јас го зборувам само она што сум го чул од Него.“

²⁷ Тие не сфатија дека им зборува за небесниот Татко. ²⁸ Исус продолжи: „Кога ќе Го подигнете^[e] Синот Човечки, тогаш ќе дознаете дека Јас Сум Тој што Сум и дека Сам од Себе ништо не правам, туку ги зборувам овие работи онака како што Ме упати Таткото. ²⁹ Тој што Ме испрати е со Мене. Тој не Ме остава Сам, затоа што Јас секогаш постапувам онака како што Тој сака да постапувам.“ ³⁰ Додека го зборуваше ова, многумина поверуваа во Него.

Вистина што ослободува

³¹ Тогаш Исус им се обрати на Евреите кои поверуваа во Него: „Вие ќе бидете Мои вистински ученици, ако се придржувате до Моето учење. ³² Тогаш ќе ја запознаете вистината, и вистината ќе ве ослободи.“

³³ Тие Му одговорија: „Ние сме потомци на Авраам и никогаш никому не сме му робувале; што сакаш да кажеш кога велиш дека ќе бидеме слободни!?“

³⁴ Исус им одговори: „Ве уверувам дека секој што греши му робува на гревот. ³⁵ А робот не останува трајно во семејството. Синот е трајно член на семејството. ³⁶ Ако Синот ве ослободи, ќе бидете навистина слободни! ³⁷ Знам дека сте потомци на Авраам, но сакате да Ме убиете, затоа што не сакате да го прифатите Моето учење. ³⁸ Јас го кажувам она што сум го видел кај Таткото. Вие постапувате онака како што ве научил вашиот татко!“

³⁹ „Нашиот татко е Авраам!“ - Му одговорија тие. Исус им рече: „Да бевте Авраамови деца^[f], ќе постапувавте онака како што постапуваше Авраам. ⁴⁰ Но вие сега сакате да Ме убиете, Мене, Човекот што ви ја зборува вистината што ја чул од Бога. Авраам не правеше така! ⁴¹ Вие го правите она што го прави и вашиот татко!“ „Ние не сме вонбрачни деца!“ - Му одговорија тие - „Еден Татко имаме, а тоа е Бог!“

⁴² Исус им рече: „Ако Бог беше ваш Татко, вие ќе Ме сакавте, зашто Јас дојдов од Бог и сега сум овде. Не дојдов само по Своја одлука, туку Тој Ме испрати. ⁴³ Зошто не разбирате што ви зборувам? - Затоа што не можете да ја поднесете Мојата порака! ⁴⁴ Вашиот татко е Ѓаволот, и вие со задоволство ги извршувате неговите желби. Тој беше човекоубиец од почетокот и никогаш не бил на страната на вистината, зашто во него нема вистина. Кога лаже, тоа произлегува од неговиот карактер, зашто тој е лажго и татко на лагата. ⁴⁵ А мене не Ми верувате, зашто Јас ја кажувам вистината. ⁴⁶ Кој од вас може да Ме обвини за грев? Ако, пак, ја зборувам вистината, тогаш зошто не Ми верувате? ⁴⁷ Оној што е од Бога, ги слуша Божјите зборови, а вие не сте од Бога и затоа не сакате да слушате.“

Вечното потекло на Исус

⁴⁸ Еврејските верски водачи Му рекоа на Исуса: „Зар не сме во право кога велиме дека Ти си Самарјанец^[g] и дека си обземен од демон!?“

⁴⁹ Исус им одговори: „Јас немам демон во Себе, зашто Го почитувам Мојот небесен Татко, а вие Ме срамотите. ⁵⁰ Иако, Јас не барам слава за Себе, Бог бара да Ме почитувате и Тој ќе суди за тоа. ⁵¹ Ве уверувам дека тој што се држи до Моето учење, никогаш нема да умре!“

⁵² Еврејските верски водачи Му рекоа: „Сега сме уверени дека си обземен од демон! Авраам умре и пророците умреа, а Ти велиш: ,Тој што се држи до Моето учење, никогаш нема да умре!‘ ⁵³ Зар си Ти поголем од нашиот татко Авраам, кој сепак умре!? А и пророците умреа. Што се замислуваш Ти!?“

⁵⁴ Исус им одговори: „Ако Јас самиот си придавам чест, Мојата слава е ништожна. Мојот Татко е Тој што Ме прославува - Оној, за Кого вие велите дека е ваш Бог, ⁵⁵ а никогаш не сте Го познавале. Јас, пак, Го знам. Кога би рекол дека не Го знам, би бил лажливец како вас. Но Јас Го знам и го извршувам тоа што Тој ќе го каже. ⁵⁶ Вашиот прататко Авраам се радуваше во очекувањето да го види денот на Моето доаѓање; тој го виде и беше пресреќен.“

⁵⁷ „Како си можел да го видиш Авраам^[h], кога немаш ни педесет години!?“ - Му рекоа еврејските верски водачи.

⁵⁸ Исус им одговори: „Ве уверувам дека уште пред да се роди Авраам, ЈАС СУМ^[i]!“ ⁵⁹ Тогаш тие зедоа камења за да фрлаат по Него, но Исус се скри и го напушти храмот.