ئیشایا 58

Kurdi Sorani Standard

«وا لە ڕۆژی بەڕۆژوبوونتان خۆشی دەبینن و
    هەموو کرێکارەکانتان دەچەوسێننەوە.
⁴ وا سەرئەنجامی ڕوژووگرتنتان دەبێتە شەڕ و ناکۆکی،
    بە خراپە مست لە یەکتری دەوەشێنن.
ئەمڕۆ بەڕۆژوو نابن
    بۆ ئەوەی لە ئاسمان دەنگتان ببیسترێت.
⁵ ئایا ئەمە ئەو ڕۆژووەیە کە من دەمەوێت؟
    مرۆڤ تەنها ڕۆژێک گیانی خۆی زەلیل دەکات،
وەک زەل سەری دادەنەوێنێت و
    لەسەر گوش و خۆڵەمێش ڕادەکشێت؟
ئایا ئەمە ناو دەنێیت ڕۆژوو،
یان ڕۆژێکی پەسەند لەلای یەزدان؟

⁶ «ئایا ئەمە ئەو ڕۆژووە نییە کە من دەمەوێت،
کۆتی ستەمکاری بکرێتەوە و
    گرێیەکانی نیر شل بکرێنەوە،
چەوساوەکان بەڕەڵا بکرێن و
    هەموو نیرێک بشکێنن؟
⁷ ئایا ئەوە نییە کە نانی خۆت بۆ برسی لەت بکەیت و
    هەژارە بێ لانەکان ببەیتە ماڵەوە،
کە ڕووتێکت بینی پۆشتەی بکەیت و
    خۆت لە خزمەکانی خۆت نەشاریتەوە؟
⁸ ئەوسا ڕووناکیت وەک بەیان پڕشنگ دەداتەوە،
    تەندروستیت بە خێرایی چرۆ دەکات،
ڕاستودروستیت لەپێشتەوە دەڕوات و
    شکۆمەندی یەزدانیش پاشڕەو و پارێزەری تۆیە.
⁹ ئەوسا هاوار دەکەیت و یەزدان وەڵام دەداتەوە،
    هاواری فریاکەوتن دەکەیت، ئەویش پێت دەفەرموێت: ئەوەتام.

«ئەگەر بەرگی ستەم لە خۆت داماڵیت و
    واز لە قسەی بەد و تاوانبارکردنی خەڵکی بهێنێت،
¹⁰ هەروەها ئەگەر خۆت بۆ برسی ماندوو بکەیت و
    پێداویستی زەلیل دابین بکەیت،
ئاوا ڕووناکیت لەناو تاریکی دەدرەوشێتەوە و
    تاریکی ئەنگوستەچاوت وەک نیوەڕۆ دەبێت.
¹¹ یەزدان هەمیشە ڕێنماییت دەکات و
    لە خاکی ڕووتەندا گیانت تێر دەکات و
    جەستەت بەهێز دەکات.
وەک باخچەیەکی تێر ئاوت لێدێت،
    کانییەک کە ئاوی لێ نەبڕێت.
¹² گەلی تۆ کەلاوە داڕووخاوە کۆنەکان بنیاد دەنێنەوە،
    بناغەکان هەڵدەستێننەوە، کە لە نەوەکانی پێشووەوەیە،
ئینجا ناوت لێ دەنێن، ”بنیادنەرەوەی شوورا“ و
    ”ئاوەدانکەرەوەی کۆڵانەکان“.

¹³ «ئەگەر بە پێیەکانت ڕۆژی شەممەت نەشکاند،
    لە ڕۆژی پیرۆزم بە ئارەزووی خۆت نەکەیت،
ئەگەر ڕۆژی شەممە بە ڕۆژی خۆشی دابنێیت و
    ڕۆژی پیرۆزی یەزدان، ڕێزدارە،
ئەگەر ڕێزی لێ بگریت بەوەی ڕێگای خۆت ئەنجام نەدەیت و
    بەدوای خۆشی خۆتەوە نەبیت و قسەکانی خۆت نەکەیت،
¹⁴ ئەوسا خۆشی لە یەزدان دەبینیت و
    سواری بەرزاییەکانی زەویت دەکەم و
    میراتەکەی یاقوبی باوکت دەرخوارد دەدەم.»
            یەزدان بە دەمی خۆی فەرمووی.