هۆشەع 8

Kurdi Sorani Standard

⁷ «ئەوان با دەچێنن و
    گەردەلوول دەدورنەوە.
چێنراوێک کە بەروبوومی نییە و
    ئاردی لێ دروستناکرێت و
ئەگەر دروستیش کرا
    بێگانەکان هەڵیدەلووشن.
⁸ ئیسرائیل هەڵلووشرا!
    ئێستا لەنێو نەتەوەکاندا
    وەک قاپێکیان لێ هاتووە کە هیچ سوودی نییە.
⁹ چونکە وەک کەرەکێوییەکی تاک و تەنها
    چوونە ئاشور.
    ئەفرایم خۆی بە چەند دۆستێک فرۆشتووە.
¹⁰ هەرچەندە ئەوان لەنێو نەتەوەکان خۆیان فرۆشتووە،
    بەڵام ئێستا من کۆیان دەکەمەوە،
    ئینجا ئەوان لەژێر باری پاشای توانادار^[a] دەفەوتێن.

¹¹ «هەرچەندە ئەفرایم قوربانگاکانی قوربانی گوناهی زۆر کرد،
    بۆی بوونە قوربانگای گوناهکردن.
¹² شتی زۆری بۆ دەنووسم کە پەیوەستە بە فێرکردنەکانم،
    بەڵام ئەو بە نامۆیان دادەنێت.
¹³ قوربانیم پێشکەش دەکەن و
    خۆیان گۆشتەکەی دەخۆن،
    بەڵام یەزدان پێیان ڕازی نییە.
ئێستا تاوانەکەیان دەهێنێتەوە یاد و
    سزای گوناهەکانیان دەدات:
    ئەوان دەگەڕێنەوە میسر.
¹⁴ ئیسرائیل دروستکەری خۆی لە یاد کرد و
    چەندین کۆشکی بنیاد نا،
    یەهوداش شارە قەڵابەندەکان.
بەڵام من ئاگر دەنێرمە سەر شارەکانی
    ئینجا قەڵاکانی دەخوات.»