यिर्मया 13

Marathi Bible: Easy-to-Read Version

¹⁵ ऐका आणि लक्ष द्या.
    परमेश्वर तुमच्याशी बोलला आहे.
    उन्मत्त बनू नका.
¹⁶ परमेश्वराचा, तुमच्या देवाचा मान राखा.
त्याचे स्तवन करा, नाहीतर तो अंधकार पसरवील.
    अंधकारमय टेकड्यांवर पडण्याआधीच त्याचे स्तुतिस्तोत्र गा.
तुम्ही यहूदाचे लोक प्रकाशाची वाट पाहता,
    पण परमेश्वर प्रकाशाचे गाढ अंधकारात रुपांतर करेल.
    तो प्रकाशाला दाट अंधारात बदलेल.
¹⁷ यहूदाच्या लोकांनो, तुम्ही जर परमेश्वराचे ऐकणार नसाल,
    तर मी एकांतात आक्रोश करीन.
तुमचा उन्मत्तपणा मला आक्रोश करायला भाग पाडेल.
    मी दारुण आकांत करीन.
माझे डोळे अश्रूंनी डबडबतील.
    का? कारण परमेश्वराच्या मेंढरांचा कळप (यहूदाचे लोक) पकडला जाईल.
¹⁸ राजा आणि राणीला या गोष्टी सांगा,
    “तुमचे सुंदर मुकुट तुमच्या डोक्यांवरुन खाली पडलेत.
    तुम्ही आता तुमच्या सिंहासनावरुन खाली उतरा.”
¹⁹ नेगेवच्या वाळवंटातील शहरे बंद केली गेली आहेत.
    कोणीही ती उघडू शकत नाही.
यहूदाच्या सर्व लोकांना कैद करुन
    परागंदा करण्यात आले आहे.

²⁰ यरुशलेम, तो पाहा!
    उत्तरेकडून शत्रू चाल करुन येत आहे.
तुझा कळप कोठे आहे देवाने तुला या सुंदर कळपाचे दान दिले.
    त्याची तू काळजी घ्यावीस अशी अपेक्षा होती.
²¹ आता त्या कळपाबद्दल परमेश्वराने जाब विचारल्यास तू काय उत्तर देणार?
    तू लोकांना देवाबद्दल ज्ञान देशील अशी अपेक्षा होती.
तुझे नेते लोकांना मार्गदर्शन करतील असे वाटत होते.
    पण त्यांनी त्यांचे कर्तव्य केले नाही.
तेव्हा आता तुला प्रसुतिवेदनांप्रमाणे वेदना
    व त्रास भोगावा लागेल.
²² तू कदाचित् स्वतःला विचारशील,
    “माझ्यावरच असा वाईट प्रसंग का आला?”
तुझ्या अनेक पापांमुळे असे झाले.
    तुझ्या पापाबद्दल तुझा घागरा फाडला गेला
    आणि तुझी पादत्राणे काढून घेण्यात आली.
तुझी मानहानी करण्यासाठी हे करण्यात आले.
²³ काळा माणूस आपल्या कातडीचा रंग बदलू शकत नाही.
    किंवा चित्ता आपल्या अंगावरील ठिपके बदलू शकत नाही.
त्याचप्रमाणे यरुशलेम, तू सुद्धा बदलणार नाहीस आणि चांगल्या गोष्टी करणार नाहीस
तू नेहमीच वाईट गोष्टी करशील.

²⁴ “मी तुम्हाला तुमची घरे सोडून जाण्यास भाग पाडीन.
    तुम्ही दाही दिशांना सैरावैरा पळत सुटाल,
    वाळवंटातील वाऱ्याने दूर उडून जाणाऱ्या फोलकटाप्रमाणे तुमची गत होईल.
²⁵ तुमच्याबाबत माझी योजना ही अशी आहे
    आणि त्याचप्रमाणे गोष्टी घडतील.”
हा परमेश्वराचा संदेश आहे.
“हे असे का घडेल?
    कारण तुम्हाला माझा विसर पडला.
    तुम्ही खोट्या देवावर विश्वास ठेवला.
²⁶ यरुशलेम, मी तुझा घागरा डोक्याकडून खेचीन.
प्रत्येकजण तुला पाहील
    आणि तुझी बेअब्रू होईल.
²⁷ मी तू केलेली भयानक कृत्ये पाहिली आहेत. ^[b]
    जारांशी हसताना आणि संभोग करताना मी तुला पाहिले आहे.
    वेश्या बनायचेच तुझ्या मनात दिसते आहे.
मी तुला डोंगरकपारीत आणि मैदानात पाहिले आहे.
यरुशलेम, हे तुझ्या दृष्टीने वाईट आहे.
    या घृणास्पद पापें तू किती काळ करणार याचे मला नवल वाटते.”