स्रेस्ठगीत 7
Awadhi Bible: Easy-to-Read Version
मनसेधू क जरिये सुन्दरता क वर्णन
7 हे सज्जन अउरत, तोहार गोड़ पनहियन मँ केतॅना सुन्नर अहइँ!
तोहार जाँघन क गोलाइ कउनो कलाकार क बना गवा गहना क नाईं अहइँ
2 तोहार नाभी क नीचे क भाग गोल कटोरा क समान अहइँ।
होइ सकत ह एहमाँ कभी मिस्रित दाखरस कमी नाहीं होत।
तोहार पेट गोहूँ क ढेरी क समान अहइ
जेकर चउहददी लिलियन क अहइँ।
3 तोहार चूचियन दुई जवान हिरण क जइसा अहइ,
कुरंगी क जुड़वा।
4 तोहार गटइ हाथी दाँत क मीनार क समान अहइँ।
तोहार आँखिन हेसबोन क उ सबइ कुण्ड क समान अहइ
जउन बेत-रब्बीम क फाटक क लगे अहइ।
तोहार नाक लबानोन क मीनार क जइसा लम्बी अहइ
जउन दमिस्क कइँती मुहँ किहे अहइ।
5 तोहार मूँड़ कर्मेल क पहाड़ क जइसा अहइ।
तोहार मूँड़े क बार
राजा क देवारन पइ लहरत भवा
लम्बा वस्त्र क नाईं अहइ।
6 तू केतनी सुन्नर अउ मनमोहक अहा ओ मोर प्रिय!
तू मोका केतॅॅना आनन्द देति अहा।
7 तू खजूरे क बृच्छ जइसी
लम्बी अहा।
तोहार चूचियन अइसे अहइँ
जइसे खजूर क गुच्छन।
8 मइँ खजूर क बृच्छ पइ चढ़ब,
मइँ एकर डारन क धरब,
तू आपन चूचियन क अंगूरे क गुच्छन स बनइ द्या।
तोहार साँस क गंध सेब क जइसा होइ द्या।
9 तोहार मुँहना उत्तिम दाखरस जइसा होइ द्या,
जउन धीरे स मोर प्रियतम मँ बहत होइ,
जउन ओठंन तलक बहत होइ जब हम साथ सोवत ह।
मेहरारू क बचन मनसेधू क बरे
10 मइँ आपन प्रियतम क अहउँ
अउर उ मोका चाहत ह।
11 आवा, मोर प्रियतम, आवा!
हम खेतन मँ निकरी चली,
हम गाँवन मँ राति बिताइ।
12 हम बहोत हाली उठी अउर अंगूरे क बागन मँ निकरी जाइ।
आवा, हम हुआँ लखी का अगूंरे क बेलन पइ कलियन खिलति अहइँ।
आवा, हम लखी का बहारन खिल गइ अहइँ
अउर का अनार क कलियन चटकति अहइँ।
हुवँइ पइ मइँ आपन पिरेम तोहका अर्पण करबउँ।
13 दोदफलन[a] क सुगन्ध फइल चुका अहइ।
अउर सबहिं प्रकार क कीमती फलन हमरे दुआरन क ऊपर[b] जमा अहइँ।
तोहार बरे नवा अउ पुराना दुइनउँ प्रकार क चीज बचाइ रखेउँ ह,
हे मोर प्रिय।
Footnotes
- 7:13 दोदफलन हिब्रू सब्द क अरथ अहइ “पिरेम बृच्छ।” एकर जर क सकल मनई क नाईं अहइ। लोगन क मानत रहिन कि इ बृच्छ मेहररुअन क गरभवती बनावइ मँ मदद करत हीं।
- 7:13 दुआरन क ऊपर प्राचीन काल बगल पूर्व क भुइँया मँ फलन क अलमारियन मँ या दुआर क ऊपर रखत रहेन। उ ओका हुवाँ तब तलक रखत रहेन जब तलक उ सूखा, बहोत मीठा अउर मज़ेदार न होइ जाई।
Awadhi Bible: Easy-to-Read Version. Copyright © 2005 Bible League International.