1 कुरिन्‍थुस 4

New Chhattisgarhi Translation (नवां नियम छत्तीसगढ़ी)

मसीह के प्रेरितमन

4 एकरसेति, मनखेमन हमन ला मसीह के सेवक अऊ परमेसर के भेद के बातमन के रखवार के रूप म जानय। ² अब ए बात के जरूरत हवय कि जऊन मन ला ए जिम्मेदारी देय गे हवय, ओमन अपन-आप ला बिसवास के लइक साबित करंय। ³ यदि तुमन या कोनो अदालत मोला परखथे, त मेंह जादा धियान नइं देवंव। वास्तव म, मेंह खुद अपन-आप ला नइं परखंव। ⁴ मोर बिवेक ह साफ हवय, पर एकर मतलब ए नो हय कि मेंह निरदोस अंव, काबरकि मोला परखइया तो परभू ए। ⁵ एकरसेति, ठहिराय गे समय के पहिली कोनो भी चीज ला झन परखव। परभू के आवत तक इंतजार करव। ओह अंधियार म छुपे बातमन ला अंजोर म लानही अऊ ओह मनखेमन के हिरदय के बात ला परगट करही। ओतकी बेरा हर एक झन परमेसर ले परसंसा पाही।

⁶ हे भाईमन, तुम्‍हर लाभ खातिर, मेंह ए बातमन म अपन अऊ अपुल्‍लोस के चरचा उदाहरन के रूप म करे हवंव, ताकि तुमन हमर ले ए कहावत के मतलब ला समझव, “परमेसर के बचन म लिखे बातमन ला मानव।” तब तुमन एक मनखे ला छोंड़के आने के ऊपर घमंड नइं करहू। ⁷ कोन ह तुमन ला आने ले बने मनखे बनाथे? तुम्‍हर करा जऊन कुछू हवय, ओह परमेसर के दुवारा दिये गे हवय। अऊ जब तुमन ला ए चीजमन मिले हवय, त तुमन काबर अइसने घमंड करथव, जइसने एमन परमेसर के दान नो हंय?

⁸ तुमन जऊन कुछू चाहथव, ओ जम्मो चीज तुम्‍हर करा पहिली ले हवय। तुमन पहिले ही धनी बन गे हवव। तुमन हमर बिगर राजा बन गे हवव। बने होतिस कि तुमन सहीच म राजा बन जातेव, ताकि हमन घलो तुम्‍हर संग राजा बन जातेन। ⁹ काबरकि मोला अइसने लगथे कि परमेसर ह हमन ला सबले आखिरी म प्रेरित ठहराय हवय अऊ ओ भी ओ मनखेमन सहीं, जऊन मन ला खुले आम मिरतू दंड के सजा सुनाय गे हवय। हमन ह स्‍वरगदूत अऊ मनखेमन के जम्मो संसार बर एक तमासा बन गे हवन^[a]। ¹⁰ हमन मसीह के खातिर मुरुख अन, पर तुमन मसीह म बहुंत बुद्धिमान अव। हमन दुरबल अन, पर तुमन बलवान अव। तुमन आदर पाथव, पर हमर अपमान होथे। ¹¹ हमन ए बखत घलो भूखन अऊ पीयासन हवन; हमन फटहा-चीरहा कपड़ा पहिरे हवन; हमन मार खावथन; हमर करा रहे बर घर नइं ए। ¹² हमन अपन हांथ ले कठोर मिहनत करथन। जब मनखेमन हमन ला गाली बकथें, त हमन ओमन ला आसिस देथन। जब हमर ऊपर अतियाचार करे जाथे, त हमन सह लेथन। ¹³ जब मनखेमन हमर बदनामी करथें, त हमन नरम अऊ सांत मन होके जबाब देथन। अभी हमन धरती के कुड़ा-कचरा सहीं संसार के बेकार चीज अन।

¹⁴ मेंह तुम्‍हर बेजत्ती करे बर ए बात नइं लिखत हवंव, पर अपन मयारू लइका जानके तुमन ला चेतावत हवंव। ¹⁵ हालाकि मसीह म तुम्‍हर देख-रेख करइया हजारों मनखे हो सकथें, पर तुम्‍हर बहुंते ददा नइं एं, काबरकि सुघर संदेस के परचार करे के दुवारा मसीह यीसू म, मेंह तुम्‍हर ददा बन गेंव। ¹⁶ एकरसेति, मेंह तुम्‍हर ले बिनती करथंव कि तुमन मोर सहीं चाल चलव। ¹⁷ एकरे कारन, मेंह अपन मयारू बेटा तीमुथियुस ला तुम्‍हर करा पठोवत हवंव। ओह परभू म बिसवास के लइक अय। ओह तुमन ला, मसीह यीसू म मोर चाल-चलन के सुरता कराही अऊ जऊन बात, मेंह हर जगह कलीसिया म सिखोथंव, ओह मोर चाल-चलन ले मेल खाथे।

¹⁸ तुमन ले कुछू झन घमंडी हो गे हवंय, जइसने कि मेंह अब तुम्‍हर करा आबेच नइं करंव। ¹⁹ पर कहूं परभू के ईछा होही, त मेंह तुम्‍हर करा बहुंत जल्दी आहूं अऊ तब मेंह देखहूं कि ए घमंडी मनखेमन का गोठियावत हवंय अऊ ओमन करा का सक्ति हवय। ²⁰ काबरकि परमेसर के राज ह बात करे के चीज नो हय, पर एह सामरथ के बात ए। ²¹ तुमन का चाहथव? का मेंह तुमन ला सजा दे बर आवंव? या फेर मेंह तुम्‍हर करा मया अऊ दयालु आतमा म होके आवंव?