1 Peetrus 3

Reimer 2001

3 Enn daem selwje wajch sel jie Fruehes june Manne unjadon senne, daut dee, dee daut Wuat nich jehuarsaum sent kjenne jewonne woare derch dee Fruehes aea Waundel, oone daut see fael saje,

² wan see aere Fruehes aea reine, aunstendje Waundel seene.

³ Lot jun Schmuck nich bloos fonn buta senne, so es Hoa flajchte, Golt ommhenje, oda straum auntrakje,

⁴ Leewa lot daut fonn benne senne, em Hoat, met en onnfejenkjliche, saunfta en stella Jeist, wiel doaraun haft Gott en grootet Jefaule.

⁵ Dan daut es so aus dee heilje Fruehes sikj freajoa utstraumde, dee aere Hopninj opp Gott sade, en weare aeare eajne Mana unjadon,

⁶ so aus Sara Obraum jehorcht en am Herr nand; en jie sent je nu aere Kjinja en doone daut waut Goot es, en ha nich angst fa irjent ne Angst.

⁷ Jie Maunslied jrod soo, wont met june Fruehes feninftich toop, wiel jie weete daut dee Fru schwaka es, en jaeft aea dee Ea dee aea traft wiel see uk en Oaw es aun dee Jnod det Laewe, so daut june Jebaed nich fehindat woare.

⁸ To goodalatst, hat aule een Senn, metfeelent, siet ju unjarenaunde goot, doot Metliede, en hat en deemuetja Senn;

⁹ Doot nich Onnracht met Onnracht trig tole, oda Schelle met Schelle, leewa doot saeajne; wiel jie weete daut jie doato beroope sent, daut jie sulle en Saeajen oawe.

¹⁰ Dan waea daut laewe wel goot senne en goode Doag ha, sull siene Tung fonn schlajchte Raed hoole, en siene Leppe daut dee nich Faulschet raede.

¹¹ Dee sull fonn daut Beeset wajch bliewe, en goodet doone; hee sull Fraed siekje en daen hinjaraun rane.

¹² Dan daem Herr siene Uage sent opp dee Jerachte, en siene Uare heare aeare Jebaed, oba daem Herr sien Jesecht es jaeajen daen dee beeset doone.

¹³ En waea woat junt Schode doone wan jie iewrich sent daut goode to doone?

¹⁴ Oba wan jie werklich omm Jerachichkjeit liede, se jie jesaeajent: hat nich Angst fe aea Trotse, en schrakjt ju nich,

¹⁵ oba heilicht Gott daem Herr em Hoat. Siet emma reed ne goode auntwuat to jaewe fa dee, dee junt froage waejen dee Hopninj dee enn ju es;

¹⁶ oba doot daut met en saunfta Senn, en enn Forcht; en hoolt jun jewesse rein so daut dee, dee junt schempe waejen jun gooda Waundel enn Christus sikj schaeme motte.

¹⁷ Dan daut es baeta wan de Herr wel daut jie liede waejen Goodet doone, aus daut jie liede waejen Schlajchdet doone.

¹⁸ Dan Christus storf uk eemol fa aul onnse Sind, dee Jerachte fa de Unjerachte, daut hee onns no Gott brinje kunn; em Kjarpa wort hee doot jemoakt, oba em Jeist wort hee laewendij jemoakt.

¹⁹ En em Jeist jinkj hee uk en praedjd to dee Jeista em Jefenkjnes,

²⁰ to daen dee onnjerhuarsaum weare es Gott ne lanje Tiet Jedult haud en Nooha siene Doag es dee Arche jebuet wort. Doa weare je mau weinich, daut heet Acht Seele dee derch daut Wota jerat worde.

²¹ Daut faeabilt - dee Taufe - es nu uk ne Radunj fa onns - nich ne Reinjunj fonn daut Drakj aum Lief, oba onnse Auntwuat Gott jaejenaewa daut onns Jewese rein es - en daut derch Jesus Christus sien oppstone fom Doot,

²² dee uk nom Himel jefoare es, en es aun Gott siene rachta Haunt; Enjel en Jewaultje en dee Majchtje sent am nu aule unjadon.