1 Peetrus 5

Reimer 2001

5 Dee Elteste dee mank ju sent femon ekj,- ekj sie je uk en Elteste, uk eena dee Christus sien Liede jeseene haft, uk eena dee aundeel haft aun dee Harlichkjeit dee boolt woat jeoppenboat woare:

² Sorcht fa Gott siene Haead dee mank ju sent, nich jedwunge oba welich so es Gott daut jefelt; nich ut Jewensucht, oba jearen,

³ uk nich so es wan jie awae aules harsche, leewa an en Faeabilt senne.

⁴ En dan wan dee Faeaschte Hoad woat kome woa jie ne Harlichkjeitskroon kriehe dee niemols fewaelkje woat.

⁵ Jrod so uk, jie jingre Manna, siet dee elre Manna unjadon; jo, siet ju aule unjarenaunda unjadon - en hoolt faust aun Deemut, dan Gott es jaejen dee Stolte, oba de Deemuetje jeft hee Jnod.

⁶ Doaromm deemuetijt junt unja Gott siene jewaultje Haunt, daut hee junt to rachte Tiet nehecht haewe kaun.

⁷ Schmiet aul june Sorje opp am, wiel hee sorcht om daut waut onns aunbelanjt.

⁸ Siet Nichta, siet Waka, wiel jun Fient de Deewel, so es en brelenda Leiw rant romm en seakjt waem hee toriete kaun;

⁹ Daem mott jie wadastone, faust em Gloowe, wiels jie weete daut june Breeda enne Welt daut selfsje liede derch gone motte.

¹⁰ Nu oba dee Gott aule Jnod, dee junt beroope haft to siene eewje Harlichkjeit enn Christus, no daem daut jie en Stootje jelaede habe woat junt selfst ennstale, bestaedje, stoakje, haeastale.

¹¹ Am jeheat aule macht enn aule Eewichkjeit! Amen!

¹² Derch Silwanus, jun truhe Brooda, -so aus ekj am aunsee- ha ekj junt met weinij Wead jeschraewe to femone, uk omm Zeichnes to jaewe daut dit Gott siene woarhauftje Jnod es, enn dee jie stone.

¹³ Dee Jemeent en Babieloon dee met ju toop jewaelt es lat ju jreese, en so uk mien Saen Markus.

¹⁴ Jreest ju unjarenaunda enn Leew met en Kuss. Fraed met aul ju dee jie en Christus Jesus sent! Amen.