Add parallel Print Page Options

Ángel na jnda̱ ˈom tjo̱o̱ⁿˈo̱ⁿ ntu ˈnaaⁿˈaⁿ. Quia joˈ ntyˈiaya cwii caxjuu na jnaⁿ tsjo̱ˈluee, tiooñê tsjoomnancue. Ndoˈ caxjuuˈñeeⁿ tquiaa Tyˈo̱o̱tsˈom tsˈo̱wˈaa nnoom cwentaaˈ cwii tsueˈ na tjaa yuu ntycwii na njoom. Seicanaaⁿñê ˈndyoo tsueˈñeeⁿ. Quia joˈ jluiˈ ndioom joˈ joˈ chaˈcwijom ndioom na cwicaluiˈ ntomˈ tˈmaⁿ. Ndoˈ ncˈe na jeeⁿ ˈaa ndioomˈñeeⁿ, seijaaⁿñenaˈ tsjoomnancue hasta tatquiooˈ na mantyˈiaaˈ ñeˈquioomˈ. Naquiiˈ ndioomˈñeeⁿ jnaⁿˈndye jndye calcaa. Tyˈentyjayoˈ nnom tsjoomnancue. Toˈñoomyoˈ na wjeeyoˈ chaˈna wˈii catsjo̱. Ndoˈ Tyˈo̱o̱tsˈom tînquiaaⁿ na wanaaⁿ na nlcwaˈyoˈ jnda̱ na niom nnom tsjoomnancue, meiⁿ tsco jnda̱a̱, meiⁿ tsco nˈoom. Macanda̱ wanaaⁿ na nntaˈwiˈyoˈ joo nnˈaⁿ na tîcañoom sa̱yo ˈnaaⁿˈaⁿ cantaana. Toˈñoomyoˈ ñˈoom na chaˈwaa ˈom chiˈ wanaaⁿ na nlˈayoˈ na nlquiinaˈ naⁿˈñeeⁿ chaˈna maquiinaˈ tsˈaⁿ quia na tcoˈ catsjo̱. Sa̱a̱ ticwanaaⁿ na nlaˈcwjeeyoˈ naⁿˈñeeⁿ. Ncueeˈñeeⁿ yocheⁿ na wiˈ cwitjoomna nlˈueeˈndye cheⁿnquieena na cwjetona, sa̱a̱ xocaliuna chiuu ya nlˈana. Nncˈomna na queeⁿ nˈomna na ñeˈcwjena, sa̱a̱ xocaliuna chiuu ya na nncwjena.

Calcaaˈñeeⁿ matseijomnaˈ jooyoˈ chaˈcwijom catso na mˈaⁿcˈeeyoˈ na nncˈooyoˈ ntiaˈ. Nqueⁿyoˈ ñjom chaˈcwijom corona na tuiinaˈ sˈom cajaⁿ ndoˈ nda̱a̱yoˈ matseijomnaˈ chaˈcwijom nnom tsˈaⁿ. Ndoˈ soonqueⁿyoˈ chaˈcwijom soonqueⁿ yolcu, ndoˈ ndeiˈnˈomyoˈ chaˈcwijom ndeiˈnˈom liom. Tsuaayoˈ chaˈcwijom ñˈeⁿ xjo tuiinaˈ. Jeeⁿ cˈuaa lquiiyoˈ chaˈcwijom cˈuaa ndyuee tornom quia na jndeii ˈoontyjaandye catso na cwiˈooyoˈ tiaˈ. 10 Ndoˈ nˈaaⁿ calcaaˈñeeⁿ matseijomnaˈ chaˈna nˈaaⁿ caljo̱, ee mati jeeⁿ wjee ndaa xioomyoˈ. Ndoˈ chaˈwaa na ˈom chiˈ wanaaⁿ na nntaˈyoˈ xioomyoˈ nnˈaⁿ. 11 Mˈaaⁿ cwii ángel na matsa̱ˈntjoom calcaaˈñeeⁿ. Jom tseixmaaⁿ na machˈeeⁿ cwenta tsueˈ na tjaa yuu ntycwii na njoom. Jom jñoom Abadón ñequio ñˈoom hebreo ndoˈ ñˈoom griego Apolión. Maˈmo̱ⁿ xueⁿˈeⁿ tsaⁿ na matseicwjee nnˈaⁿ.

12 Jnda̱ teinom na tcoˈnaˈ ntyˈiaya cwii nawiˈ na quia nntjoom nnˈaⁿ. Sa̱a̱ cantyˈiaˈ, ndicwaⁿ waa we nawiˈ na quia nncueˈntyjo̱.

13 Ángel na jnda̱ yom tjo̱o̱ⁿˈo̱ⁿ ntu ˈnaaⁿˈaⁿ, quia joˈ quiiˈntaaⁿ ñequiee nqui nomtsˈom na tuiinaˈ ñˈeⁿ sˈom cajaⁿ na meiⁿntyjeeˈnaˈ jo nnom Tyˈo̱o̱tsˈom, jndiiya na teicˈuaa seineiⁿ. 14 Tso nnom ángel na jnda̱ yom na maleiñˈoom ntu:

—Cjaˈtseicanaⁿˈ joo ñequiee ángeles na chuˈtyeⁿndye na mˈaⁿ joo jndaa tˈmaⁿ Eufrates.

15 Quia joˈ tjatseicanaaⁿˈaⁿ ángelesˈñeeⁿ na cˈoolaˈcwjeena nnˈaⁿ chaˈwaa tsjoomnancue. Manndyooˈ chaˈna xcwe nnˈaⁿ tsjoomnancue nlaˈcwjeena. Ee ángelesˈñeeⁿ majndaaˈ na mˈaⁿcˈeendyena na nlˈana tsˈiaaⁿˈñeeⁿ chuwaa, ndoˈ chiˈwaa, ndoˈ xueewaa, ndoˈ horawaa. 16 Ndoˈ jndiiya cantyja ˈnaaⁿ sondaro ˈnaaⁿna, na ntyjondye catso, tueˈntyjo̱ chaˈna ntquiuu meiⁿ ndiiˈ na nqui nqui meiⁿndyena.

17 Luaaˈ waa na tcoˈnaˈ no̱o̱ⁿ na ntyˈiaya catsoˈñeeⁿ ñequio sondaro na ntyjondye jooyoˈ. Naⁿˈñeeⁿ cweeˈna ncjo candyaana na mawañoomˈnaˈ joona na tilquieeˈndyena. Ndoˈ ncjoˈñeeⁿ chonaˈ colo wee ñequio colo tsa̱, ñequio colo cajaⁿ. Ndoˈ matseijomnaˈ nqueⁿ catsoˈñeeⁿ chaˈna nqueⁿ liom. Ndoˈ naquiiˈ ndyueeyoˈ cwicaluiˈ chom ñequio ndioom ñequio sufra̱. 18 Ñequio ndyee nnom nawiˈñeeⁿ na jluiˈ quiiˈ ndyueeyoˈ, chom ñequio ndioom ñequio sufra̱, joˈ na tja̱ manndyooˈ xcwe nnˈaⁿ na mˈaⁿ tsjoomnancue. 19 Catsoˈñeeⁿ we ndiiˈ waa na jnda̱yoˈ na cwitaˈwiˈyoˈ nnˈaⁿ, naquiiˈ ndyueeyoˈ ndoˈ nˈaaⁿyoˈ. Ee yuu na tjacantycwii nˈaaⁿyoˈ joˈ ntyjoo nqueⁿ canduu. Ndoˈ canduuˈñeeⁿ nioom tyotquiiyoˈ nnˈaⁿ.

20 Sa̱a̱ nnˈaⁿ na ˈndiinaˈ na tîcwje ñequio nawiˈmeiⁿˈ, tîcalcweˈ nˈomna. Tîcaˈndyena natia na cwilˈana, meiⁿ tîcˈoomeintyjeeˈna na cwilaˈtˈmaaⁿˈndyena naⁿjndii ñequio ˈnaⁿ na cweˈ nnˈaⁿ nlˈa na tuii ñˈeⁿ sˈom cajaⁿ, ñˈeⁿ sˈom xuee, ñˈeⁿ sˈom wee, ñˈeⁿ ljo̱ˈ, ndoˈ ñˈeⁿ nˈoom. ˈNaⁿmeiⁿˈ tileiˈcantyˈiaanaˈ, meiⁿ na nndyenaˈ, nmeiⁿ na nncˈoocaˈnaˈ. 21 Ndoˈ tîcalcweˈ nˈomna na cwilaˈcwjeena ncˈiaana. Meiⁿ tîcaˈndyena cantyja na cwilaˈcaluaˈndyena, meiⁿ cantyja na cweˈ cwimˈaⁿyana ñˈeⁿ ncˈiaana, meiⁿ cantyja na cwintyˈueena ˈnaⁿ.