³ “Rubeni, ndiwe woyamba kubadwa;
    mphamvu yanga ndiponso chizindikiro choyamba cha mphamvu zanga,
    wopambana pa ulemerero ndi mphamvu.
⁴ Wokokoma ngati madzi a chigumula, koma sudzakhalanso wopambana,
    iwe unagona pa bedi la abambo ako,
    ndithu unayipitsa bedi la mdzakazi wake.

⁵ “Simeoni ndi Levi ndi pachibale pawo,
    anachitira nkhanza anthu amene anachita nawo pangano.
⁶ Iwe moyo wanga, usakhale nawo pa misonkhano yawo ya mseri,
    kapena kugwirizana nawo mʼmabwalo awo,
pakuti anapha anthu mu mkwiyo wawo
    ndipo anapundula ngʼombe zamphongo monga kunawakomera.
⁷ Matemberero awagwere chifukwa cha mkwiyo wawo woopsa chonchi
    ndi ukali wawo wankhanza choterewu!
Ine ndidzawabalalitsa mʼdziko la Yakobo
    ndi kuwamwaza iwo mʼdziko la Israeli.

⁸ “Yuda, ndiwe amene abale ako adzatamanda;
    dzanja lako lidzagwira pa khosi pa adani ako;
    abale ako adzakugwadira iwe.
⁹ Yuda ali ngati mwana wa mkango;
    umabwerera ku malo ako ndi zofunkha, mwana wanga.
Monga mkango, amadziwongola ndi kugona pansi,
    ndipo ngati mkango waukazi, ndani angalimbe mtima kumudzutsa?
¹⁰ Ndodo yaufumu sidzachoka mwa Yuda,
    udzawupanirira ulamuliro motero kuti palibe amene adzawuchotse,
mpaka mwini wake weniweni atabwera
    ndipo mitundu yonse ya anthu idzamumvera.
¹¹ Ndiye amene amamangirira bulu wake wamkazi kumtengo wa mpesa,
    ndi mwana wa bulu ku nthambi ya mpesa wabwino.
Ndi iye amene amachapa zovala zake mu vinyo;
    ndi mkanjo wake mu vinyo wofiira ngati magazi.
¹² Maso ake adzakhala akuda chifukwa cha vinyo,
    mano ake woyera chifukwa cha mkaka.

¹³ “Zebuloni adzakhala mʼmphepete mwa nyanja;
    adzakhala pa dooko la sitima zapamadzi;
    malire ake adzafika ku Sidoni.

¹⁴ “Isakara ali ngati bulu wamphamvu
    wogona pansi pakati pa makola.
¹⁵ Ataona ubwino wake wa pamalo pake popumira
    ndi kukongola kwa dziko lake,
iye anaweramutsa msana kuti anyamule katundu wake
    ndipo anasanduka wogwira ntchito ya ukapolo.

¹⁶ “Dani adzaweruza mwachilungamo anthu ake
    monga limodzi mwa mafuko a anthu a mu Israeli.
¹⁷ Dani adzakhala ngati njoka ya mʼmphepete mwa msewu,
    songo yokhala mʼnjira
imene imaluma chidendene cha kavalo
    kuti wokwerapoyo agwe chagada.

¹⁸ “Ndikuyembekeza chipulumutso chanu Yehova.

¹⁹ “Gadi adzachitidwa chiwembu ndi gulu la amaliwongo,
    koma iye adzawathamangitsa.

²⁰ “Dziko la Aseri lidzabereka chakudya chokoma,
    ndipo iye adzapereka chakudya kwa mafumu.

²¹ “Nafutali ali ngati mbawala yayikazi
    yokhala ndi ana okongola kwambiri.

²² “Yosefe ali ngati mtengo wobereka zipatso,
    mtengo wobereka zipatso pafupi ndi kasupe,
    nthambi zake zimayanga pa chipupa cha mwala.
²³ Alenje a uta anamuchita chiwembu mwankhanza;
    anamuthamangitsa ndi mauta awo.
²⁴ Koma uta wake sunagwedezeke,
    ndi manja ake amphamvu aja analimbika,
chifukwa cha mphamvu za Mulungu Wamphamvu wa Yakobo,
    chifukwa ali Mʼbusa ndi Thanthwe la Israeli.
²⁵ Chifukwa cha Mulungu wa makolo ako amene amakuthandiza;
    chifukwa cha Mulungu Wamphamvu, amene amakudalitsa
ndi mvula yochokera kumwamba,
    ndi madzi otumphuka pansi pa nthaka,
    ndipo amakudalitsa pokupatsa ana ambiri ndi ngʼombe zambiri.
²⁶ Madalitso a kholo lako ndi amphamvu kuposa
    madalitso a mapiri akale
    oposa zabwino za ku zitunda zamgonagona.
Zonse izi zikhale pamutu pa Yosefe,
    pa mphumi pa wopatulika uja amene anapatulidwa pakati pa abale ake.

²⁷ “Benjamini ali ngati mʼmbulu wolusa;
    umene mmawa umapha ndi kudya zofunkha,
    ndipo madzulo umagawa zofunkhazo,”