Hosea 5

Bíbélì Mímọ́ Yorùbá Òde Òn

⁴ “Ìṣe wọn kò gbà wọ́n láààyè
    láti padà sí ọ̀dọ̀ Ọlọ́run wọn.
Ẹ̀mí àgbèrè wà ni ọkàn wọn,
    wọn kò sì mọ Olúwa.
⁵ Ìgbéraga Israẹli ń jẹ́rìí lé wọn;
    Àwọn ọmọ Israẹli, àti Efraimu pàápàá kọsẹ̀ nínú ẹ̀ṣẹ̀ wọn.
    Juda náà sì kọsẹ̀ pẹ̀lú wọn.
⁶ Nígbà tí wọ́n bá lọ pẹ̀lú agbo ẹran
    àti ọ̀wọ́ ẹran wọn láti wá Olúwa,
wọn kò ní rí i,
    ó ti yọ ara rẹ̀ kúrò láàrín wọn.
⁷ Wọ́n jẹ́ aláìṣòótọ́ sí Olúwa
    wọ́n sì bí àwọn àjèjì ọmọ.
Nísinsin yìí, ọdún oṣù tuntun wọn,
    ni yóò pa wọn run pẹ̀lú ìpín wọn.

⁸ “Fọn fèrè ní Gibeah,
    kí ẹ sì fun ìpè ní Rama.
Ẹ pariwo ogun ní Beti-Afeni
    máa wárìrì, ìwọ Benjamini.
⁹ Efraimu yóò di ahoro
    ní ọjọ́ ìbáwí
láàrín àwọn ẹ̀yà Israẹli
    Mo sọ ohun tí ó dájú.
¹⁰ Àwọn olórí Juda dàbí àwọn tí í
    máa yí òkúta ààlà kúrò.
Èmi ó tú ìbínú gbígbóná mi lé
    wọn lórí bí ìkún omi.
¹¹ A ni Efraimu lára,
    A sì tẹ̀ ẹ́ mọ́lẹ̀ ní ìdájọ́
    nítorí pé, ó pinnu láti tẹ̀lé òrìṣà
¹² Mo dàbí kòkòrò aṣọ sí Efraimu
    Mo sì dàbí ìdin ara Juda.

¹³ “Nígbà ti Efraimu ri àìsàn rẹ̀,
    tí Juda sì rí ojú egbò rẹ̀
ni Efraimu bá tọ ará Asiria lọ,
    ó sì ránṣẹ́ sí ọba ńlá náà fún ìrànlọ́wọ́
Ṣùgbọ́n kò le è wò ó sàn
    bẹ́ẹ̀ ni kò le wo ojú egbò rẹ̀ jinná
¹⁴ Nítorí pé, èmi ó dàbí kìnnìún sí Efraimu,
    bí i kìnnìún ńlá sí ilé Juda.
Èmi ó fà wọ́n ya pẹ́rẹpẹ̀rẹ èmi ó sì lọ;
    Èmi ó gbé wọn lọ, láìsí ẹni tí yóò gbà wọ́n sílẹ̀.
¹⁵ Nígbà náà ni èmi ó padà lọ sí ààyè mi
    títí di ìgbà tí wọn ó fi gbà pé àwọn jẹ̀bi
wọn yóò sì wá ojú mi
    nínú ìpọ́njú wọn, wọn ó fi ìtara wá mi.”