Hulubaton 9

Ang Pulong Sang Dios

Ang Kaalam kag ang Kabuangan

9 Ang kaalam pareho sa isa ka tawo nga nagpatindog sang dako kag matahom nga balay.^{[a] 2} Nagpapunsyon siya. Ginpreparar niya ang mga pagkaon kag mga ilimnon. ³ Dayon ginsugo niya ang iya mga suluguon nga babayi sa pagkadto sa mataas nga mga lugar sang siyudad agod ipahibalo ini: ⁴ “Kamo nga mga wala sing alam kag pag-intiendi, imbitado kamo sa punsyon. ⁵ Kadto kamo kag magkaon sang pagkaon kag mag-inom sang ilimnon nga akon ginpreparar. ⁶ Dulaa na ninyo ang inyo pagkaignorante agod padayon kamo nga magakabuhi. Magkabuhi kamo nga may pag-intiendi.”

⁷ Kon sawayon mo ang tawo nga nagapangyaguta, insultuhon ka niya. Kon sabdungon mo ang malaot nga tawo, sakiton ka niya. ⁸ Indi pagsawaya ang tawo nga nagapangyaguta kay kainitan ka niya. Sawaya ang maalamon nga tawo kag higugmaon ka niya. ⁹ Kon tudluan mo ang maalamon, madugangan pa gid ang iya kaalam. Kon tudluan mo ang matarong nga tawo, madugangan pa gid ang iya natun-an.

¹⁰ Kon gusto mo nga magmaalamon, dapat magtahod ka sa Ginoo. Kon ginakilala mo ang Balaan nga Dios, may pag-intiendi ka. ¹¹ Paagi sa kaalam, magalawig ang imo kabuhi. ¹² Kon maalamon ka, makahatag ini sa imo sang kaayuhan, pero kon ginahikayan mo ang kaalam, ginapaantos mo lang ang imo kaugalingon.

¹³ Ang kabuangan pareho sa isa ka babayi nga magahod, wala sing alam, kag wala sing may nahibaluan. ¹⁴ Nagapungko siya sa puwertahan sang iya balay ukon sa mataas nga mga lugar sang siyudad, ¹⁵ kag nagapanawag sa mga nagaalagi, nga nagapakadto sa ila mga trabaho. ¹⁶ Siling niya, “Dali kamo diri, kamo nga mga wala sing alam.” Kag siling pa niya sa mga wala sing pag-intiendi, ¹⁷ “Mas manami ang tubig nga kinawat kag mas manamit ang pagkaon kon kaunon sa tago.”^{[b] 18} Pero wala kahibalo ini nga mga tawo nga ang mga nagakadto sa iya nagakapatay. Ang mga nakakadto na sa iya ara na subong sa lugar sang mga patay.