Marcos 5

Mushuj Testamento Diospaj Shimi

Jesusca Gadara llajta runamantami supaita llujshichishca

5 Mama cuchata ch'imbashpaca, gadarenocunapaj llajtamanmi chayarcacuna. ² Barcomanta Jesús llujshijpica, mapa espíritu japishca shuj runaca tupanaman panteonmanta ñapish shamurcallami. ³ Paica, huañushcacunata churana jutcucunallapimi causaj carca. Cadenacunahuanpish paitaca, pi mana huatai tucurcachu. ⁴ Tauca cutinmi canichina fierrocunahuanpish, cadenacunahuanpish huatajcuna carca. Ashtahuanpish cadenacunataca p'itishpa, canichishca fierrocunatapish ñutushpa shitajlla cajpimi, pi mana chari tucurca. ⁵ Shinallataj punllapish tutapish urcucunata, panteoncunatami caparirishpa, paillataj rumicunahuan chugririshpa puricujlla carca. ⁶ Paimi Jesusta carumanta ricushpaca, callpashpa shamushpa, Paipaj ñaupajpi shitarirca.

⁷ Shinallataj sinchita caparishpami:

–Jahua pacha Diospaj Churi Jesús, ¿ñucataca ima ninatataj charingui? ¡Diospaj shutipimi mañani, ñucataca amataj jatunta llaquichihuaichu!– nircami.

⁸ «Mapa espíritu, cai runamanta llujshi» nicushcamantami, chashnaca nirca.

⁹ Jesusca chai runataca:

–¿Ima shutitaj cangui?– nishpa tapujpica, achcacuna cashcamantami:

–Huaranga huaranga shutimi cani– nishpa cutichirca.

¹⁰ ‘Amataj cai llajtamanta llujshichishpa cachahuaichu’ nishpami, achcata mañarca. ¹¹ Chai c'uchulla lomapica, achca cuchi canllatami michicurca. ¹² Chaimantami, chai tucui supaicunaca:

–Chai cuchicunapi yaicugrichun saquihuai– nishpa mañarcacuna.

¹³ Jesusca chashna nincami, richun saquirca. Mapa espiritucunaca, chai runamanta llujshishcahuanmi, cuchicunapi yaicugrirca. Cuchicunaca ishqui huaranga shinami carca. Chaimantami chai tucui cuchi canllaca, c'aca quinrita singushpa, mama cuchaman huashicushpa huañurcacuna.

¹⁴ Cuchi michijcunaca, paicunapaj pueblocunapi, llajtacunapimi, imalla tucushcata huillanaman callparcacuna. Chaita uyajcunaca, ima tucushcata ricungapajmi shamurcacuna. ¹⁵ Paicuna Jesuspajman shamushpaca, nanaihuan llaquichicuj huaranga huaranga supaicunata llujshichishca runataca ña alli yuyaihuan, churanacunatapish churashca tiyacujtami ricurcacuna. Chaita ricushpaca mancharircacunami. ¹⁶ Supai japishca runapish, cuchicunapish imalla tucushcata ricujcunami tucuita parlarcacuna. ¹⁷ Chaimantami, paicunapaj llajtacunamantaca, llujshishpa richun mañai callarircacuna.

¹⁸ Barcopi ña yaicugrijpimi, supaicuna llujshishca runaca Jesustaca, Paihuan pushachun mañarca. ¹⁹ Ashtahuanpish Jesusca, Paihuan richun mana saquishpami:

–Cambaj huasiman tigrailla. Mandaj Dios canpi imalla jatun allicunata rurashcata, ima shina canta llaquishcata, cambaj aillucunaman parlagrilla– nirca.

²⁰ Pai rishpaca, imalla jatun allicunata Jesús paipi rurashcatami, Decápolis pueblocunapi huillashpa puri callarirca. Chaimantami, tucuicuna mancharishpa cushicurcacuna.

Jesusca shuj huambrataca causachishca, shuj huarmitaca alliyachishcami

²¹ Jesusca, barcopi cuchata cutin ch'imbashpami caishuj uriman chayarca. Chaipipish yallitaj achcacunami Paipajman tandanacumurca. Paica, mama cucha c'uchu urillapimi carca. ²² Chaimanca, tandanacuna huasipi pushaj Jairo shuti runami shamurca. Jesusta ricushpaca, Paipaj chaquipimi cungurishpa cumurirca. ²³ Chaimantaca:

–Ñuca ushushimari huañucupan. Paipaj jahuapi maquita churanaman jacupai. Chashna rurajpica alliyashpa, mana huañungachu– nishpami, achcata mañacurca.

²⁴ Jesús ña paihuan ricujpica, mana jahualla gentecunami llapirinacui caticurcacuna. ²⁵ Chaicunapurapica, chunga ishqui huatata yahuar cacharirishpa ungushca shuj huarmimi caticurca. ²⁶ Paica jambijcunapajpi jambiricushpallami, tucui imalla charishcacunallata tucuchishpa, manataj alliyashpa, achca llaquita aparca. Ashtahuan anchayashpallami caticurca. ²⁷ Jesusmanta parlanacujta uyashpaca, chai tucuicunapaj chaupita rishpami, huashamanta Jesuspaj churanapi tuparirca. ²⁸ Paica: «Jesuspaj churanapi tuparishpallapish alliyashallami» yuyashpami, chashna tuparirca. ²⁹ Chaipica cachariricushca yahuarca, ñapish chaquirircallami. Chaimantami paipaj aichamanta chai ungüi anchurishpa, chuya saquirishcata yacharca. ³⁰ Jesuspish, chai huarmi alliyancami, alliyachi tucuna paimanta llujshishcata sentirca. Chaimantami, tucuicunapajman tigrarishpaca:

–¿Pitaj Ñuca churanacunapi tuparinchu, imamí?– nishpa tapurca.

³¹ Paipaj yachacujcunaca:

–Cai tucuicuna Canta llapimucujtaca, ¿manachu ricungui? ¿Maitataj, “¿Pitaj tuparin?” nishpaca tapunguiari?– nircacunami.

³² Shina nijpipish pi tuparishcata ricungapajmi, Jesusca muyundijta ricucurca. ³³ Chaimantami chai huarmica, Pai ima shina alliyashcata yachashcamanta, manchaihuan chujchushpa Jesuspajman shamurca. Paipaj ñaupajpi pambacama cumurishpami, ima shinalla tucushcata tucuita huillarca.

³⁴ Chaipimi Jesusca:

–¡Huahua, can crishcamantami alliyashcangui! Cunanca, ama manchashpa rilla, canta llaquichicuj ungüimantapish alliyai– nircami.

³⁵ Jesús rimacujpirajmi, tandanacuna huasipi pushajpaj huasimanta shamushpaca:

–Ñamari quiquinpaj ushushica huañun. ¿Yachachijtaca imapajtaj, ashtahuan p'iñachicungui?– nircacuna.

³⁶ Ashtahuanpish chashna nicujta uyashpami, tandanacuna huasipi pushajtaca:

–Ama manchaichu, canca crilla– nirca.

³⁷ Chaimantaca pi shujtajta mana pushashpami Pedrota, Jacobota, Jacobopaj huauqui Juandijllata pusharca. ³⁸ Tandanacuna huasipi pushajpaj huasiman chayashpaca, achcata huacashpa, anchata llaquirinacushpa caparirinacucujtami ricurca. ³⁹ Huasiman yaicushpaca:

–¿Imamantataj caparirishpa huacacunguichij? Huambraca mana huañushcachu, dormicunllamari– nircami.

⁴⁰ Chashna nijpica, Jesustaca yanganchishpami asircacuna. Ashtahuanpish Paica tucuicunata canllaman llujshichishpaca, yayandij mamandij, paihuan cajcunandijllami huahuapajmanca yaicurca. ⁴¹ Chaipica huambrapaj maquita japishpaca:

–¡Talita cumi!– nircami. (Chaica: “Huambrita, cantami nini, jatari” nisha ninmi).

⁴² Chashna nijpica, chai huahuaca jatarishcahuan, ña purircallami. Chai huambraca, chunga ishqui huatayujmi carca. ⁴³ Jesusca cutin cutinmi, ‘Caitaca, pajta piman huillanguichijman’ nirca. Huambramanca micunata carachunmi mandarca.