Nʼkwabwino kwambiri kuyimba nyimbo zamatamando kwa Mulungu wathu,
    nʼkokondweretsa ndi koyenera kumutamanda!

² Yehova akumanga Yerusalemu;
    Iye akusonkhanitsa amʼndende a Israeli.
³ Akutsogolera anthu osweka mtima
    ndi kumanga mabala awo.

⁴ Amadziwa chiwerengero cha nyenyezi,
    ndipo iliyonse amayitchula dzina.
⁵ Yehova ndi wamkulu ndi wamphamvu kwambiri;
    nzeru zake zilibe malire.
⁶ Yehova amagwiriziza anthu odzichepetsa,
    koma amagwetsa pansi anthu oyipa.

⁷ Imbirani Yehova ndi mayamiko;
    imbani nyimbo kwa Mulungu ndi pangwe.
⁸ Iye amaphimba mlengalenga ndi mitambo;
    amapereka mvula ku dziko lapansi
    ndi kumeretsa udzu mʼmapiri.
⁹ Iye amapereka chakudya kwa ngʼombe
    ndi kwa ana a makwangwala pamene akulira chakudya.

¹⁰ Chikondwerero chake sichili mʼmphamvu za kavalo,
    kapena mʼmiyendo ya anthu amphamvu.
¹¹ Yehova amakondwera ndi amene amamuopa,
    amene chiyembekezo chawo chili mʼchikondi chake chosasinthika.

¹² Lemekeza Yehova, iwe Yerusalemu;
    tamanda Mulungu wako, iwe Ziyoni,
¹³ pakuti Iye amalimbitsa mipiringidzo ya zipata zako
    ndi kudalitsa anthu ako mwa iwe.
¹⁴ Iye amabweretsa mtendere mʼmalire mwako
    ndi kukukhutitsa ndi ufa wa tirigu wosalala.

¹⁵ Iyeyo amapereka lamulo pa dziko lapansi;
    mawu ake amayenda mwaliwiro.
¹⁶ Amagwetsa chisanu ngati ubweya
    ndi kumwaza chipale ngati phulusa.
¹⁷ Amagwetsa matalala ngati miyala.
    Kodi ndani angathe kupirira kuzizira kwake?
¹⁸ Amatumiza mawu ake ndipo chisanucho chimasungunuka;
    amawombetsa mphepo ndipo madzi amayenda.

¹⁹ Iye anawulula mawu ake kwa Yakobo,
    malamulo ake ndi zophunzitsa zake kwa Israeli.
²⁰ Sanachitepo zimenezi kwa mtundu wina uliwonse wa anthu;
    anthu enawo sadziwa malamulo ake.

Tamandani Yehova.