³ At samantalang siya'y nakaupo sa bundok ng mga Olivo, ay nagsilapit sa kaniya ng bukod ang mga alagad, na nagsisipagsabi, Sabihin mo sa amin, kailan mangyayari ang mga bagay na ito? at ano ang magiging tanda ng iyong pagparito, at ng katapusan ng sanglibutan?

⁴ At sumagot si Jesus at sinabi sa kanila, Mangagingat kayo na huwag kayong mailigaw ninoman.

⁵ Sapagka't marami ang magsisiparito sa aking pangalan, na mangagsasabi, Ako ang Cristo; at ililigaw ang marami.

⁶ At mangakakarinig kayo ng mga digmaan at mga alingawngaw ng mga digmaan; ingatan ninyo ^(A)na huwag kayong magulumihanan: sapagka't kinakailangang ito'y mangyari datapuwa't hindi pa ang wakas.

⁷ Sapagka't magsisitindig ang bansa laban sa bansa, at ang kaharian laban sa kaharian; at magkakagutom at lilindol sa iba't ibang dako.

⁸ Datapuwa't ang lahat ng mga bagay na ito ay siyang pasimula ng kahirapan.

⁹ Kung magkagayo'y ibibigay kayo ^(B)sa kapighatian, at kayo'y papatayin: at kayo'y kapopootan ng lahat ng mga bansa dahil sa aking pangalan.

¹⁰ At kung magkagayo'y maraming ^(C)mangatitisod, at mangagkakanuluhan ang isa't isa, at mangagkakapootan ang isa't isa.

¹¹ At magsisibangon ang ^(D)maraming bulaang propeta, at kanilang ililigaw ang marami.

¹² At dahil sa pagsagana ng katampalasanan, ang pagibig ng marami ay lalamig.

¹³ Datapuwa't ^(E)ang magtitiis hanggang sa wakas ay siyang maliligtas.

¹⁴ At ^(F)ipangangaral ang evangeliong ito ng kaharian sa buong sanglibutan sa pagpapatotoo sa lahat ng mga bansa; at kung magkagayo'y darating ang wakas.

⁷ At kanilang itinanong sa kaniya, na sinasabi, Guro, kailan nga mangyayari ang mga bagay na ito? at ano ang magiging tanda pagka malapit ng mangyari ang mga bagay na ito?

⁸ At sinabi niya, Mangagingat kayo na huwag kayong mangailigaw: ^(A)sapagka't marami ang paririto sa aking pangalan, na mangagsasabi, Ako ang Cristo; at, Malapit na ang panahon: huwag kayong magsisunod sa kanila.

⁹ At pagka kayo'y nangakarinig ng mga digmaan at mga kaguluhan, ay huwag kayong mangasindak: sapagka't kinakailangang mangyari muna ang mga bagay na ito; datapuwa't hindi ^(B)pa malapit ang wakas.

¹⁰ Nang magkagayo'y sinabi niya sa kanila, Magtitindig ang isang bansa laban sa bansa, at ang isang kaharian laban sa kaharian;

¹¹ At magkakaroon ng malalakas na lindol, at sa iba't ibang dako ay magkakagutom at magkakasalot; at magkakaroon ng mga bagay na kakilakilabot, at ng mga dakilang tanda mula sa langit.

¹² Datapuwa't bago mangyari ang lahat ng mga bagay na ito, ay huhulihin ^(C)kayo, at paguusigin kayo, na kayo'y ibibigay sa mga sinagoga at ^(D)sa mga bilangguan, na kayo'y dadalhin sa harapan ng mga hari at mga gobernador dahil sa aking pangalan.

¹³ Ito'y magiging patotoo ^(E)sa inyo.

¹⁴ Pagtibayin nga ninyo ang inyong mga puso, ^(F)na huwag munang isipin kung paano ang inyong isasagot:

¹⁵ Sapagka't bibigyan ko kayo ng ^(G)isang bibig at karunungan, na hindi mangyayaring masalangsang o matutulan man ng lahat ninyong mga kaalit.

¹⁶ Datapuwa't kayo'y ibibigay ng kahit mga magulang, at mga kapatid, at mga kamaganak, at mga kaibigan; at ipapapatay nila ang iba sa inyo.

¹⁷ At kayo'y kapopootan ng lahat ng mga tao dahil sa aking pangalan.

¹⁸ At hindi mawawala kahit ^(H)isang buhok ng inyong ulo.

¹⁹ Sa inyong ^(I)pagtitiis ay maipagwawagi ninyo ang inyong mga kaluluwa.