² Munthu wanzeru amayankhula zinthu za nzeru,
    koma pakamwa pa zitsiru pamatulutsa za uchitsiru.

³ Maso a Yehova ali ponseponse,
    amayangʼana pa oyipa ndi abwino omwe.

⁴ Kuyankhula kodekha kuli ngati mtengo wopatsa moyo,
    koma kuyankhula kopotoka kumapweteka mtima.

⁵ Chitsiru chimanyoza mwambo wa abambo ake,
    koma wochenjera amasamala chidzudzulo.

⁶ Munthu wolungama amakhala ndi chuma chambiri,
    zimene woyipa amapindula nazo zimamugwetsa mʼmavuto.

⁷ Pakamwa pa anthu anzeru pamafalitsa nzeru;
    koma mitima ya zitsiru sitero.

⁸ Nsembe za anthu oyipa zimamunyansa Yehova,
    koma amakondwera ndi pemphero la anthu owona mtima.

⁹ Ntchito za anthu oyipa zimamunyansa Yehova
    koma amakonda amene amafunafuna chilungamo.

¹⁰ Amene amasiya njira yabwino adzalangidwa koopsa.
    Odana ndi chidzudzulo adzafa.

¹¹ Manda ndi chiwonongeko ndi zosabisika pamaso pa Yehova,
    nanji mitima ya anthu!

¹² Wonyoza sakonda kudzudzulidwa;
    iye sapita kwa anthu anzeru.

¹³ Mtima wokondwa umachititsa nkhope kukhala yachimwemwe,
    koma mtima wosweka umawawitsa moyo.

¹⁴ Mtima wa munthu wozindikira zinthu umafunafuna nzeru,
    koma pakamwa pa zitsiru pamadya uchitsiru wawo.

¹⁵ Munthu woponderezedwa masiku ake onse amakhala oyipa,
    koma mtima wachimwemwe umakhala pa chisangalalo nthawi zonse.

¹⁶ Kuli bwino kukhala ndi zinthu pangʼono nʼkumaopa Yehova,
    kusiyana ndi kukhala ndi chuma chambiri uli pamavuto.

¹⁷ Kuli bwino kudyera ndiwo zamasamba pamene pali chikondi,
    kusiyana ndi kudyera nyama yangʼombe yonenepa pamene pali udani.

¹⁸ Munthu wopsa mtima msanga amayambitsa mikangano,
    koma munthu woleza mtima amathetsa ndewu.

¹⁹ Njira ya munthu waulesi ndi yowirira ndi mtengo waminga,
    koma njira ya munthu wolungama ili ngati msewu waukulu.

²⁰ Mwana wanzeru amakondweretsa abambo ake,
    koma mwana wopusa amanyoza amayi ake.

²¹ Uchitsiru umakondweretsa munthu wopanda nzeru,
    koma munthu womvetsa zinthu amayenda mowongoka.

²² Popanda uphungu zolinga zako munthu zimalephereka,
    koma pakakhala aphungu ambiri zolinga zimatheka.

²³ Munthu amakondwera ndi kuyankha koyenera,
    ndipo mawu onena pa nthawi yake ndi okoma.

²⁴ Munthu wanzeru amatsata njira yopita ku moyo
    kuti apewe malo okhala anthu akufa.

²⁵ Yehova amapasula nyumba ya munthu wonyada
    koma amasamalira malo a mkazi wamasiye.

²⁶ Maganizo a anthu oyipa amamunyansa Yehova,
    koma mawu a anthu oyera mtima amamusangalatsa.

²⁷ Munthu wofuna phindu mwachinyengo amavutitsa banja lake,
    koma wodana ndi ziphuphu adzakhala ndi moyo.

²⁸ Munthu wolungama amaganizira za mmene ayankhire,
    koma pakamwa pa munthu woyipa pamatulutsa mawu oyipa.

²⁹ Yehova amakhala kutali ndi anthu oyipa,
    koma amamva pemphero la anthu olungama.

³⁰ Kuwala kwa maso kumasangalatsa mtima
    ndipo uthenga wabwino umalimbitsa munthu.

³¹ Womvera mawu a chidzudzulo amene apatsa moyo
    adzakhala pakati pa anthu anzeru.

³² Amene amanyoza mwambo amadzinyoza yekha,
    koma womvera mawu a chidzudzulo amapeza nzeru zomvetsa zinthu.

³³ Kuopa Yehova kumaphunzitsa munthu nzeru,
    ndipo kudzichepetsa ndi ulemu chili patsogolo ndi kudzichepetsa.