² Zochita zonse za munthu zimaoneka zabwino pamaso pake,
    koma Yehova ndiye amasanthula zolinga zako.

³ Pereka ntchito zako zonse mʼmanja mwa Yehova,
    ndipo zolinga zako zidzachitikadi.

⁴ Yehova amachita zonse ndi cholinga chake,
    ngakhale anthu oyipa kuti aone tsiku latsoka.

⁵ Munthu aliyense wodzikuza amamunyansa Yehova.
    Koma dziwani izi: Iwo sadzakhala osalangidwa.

⁶ Chifukwa cha chikondi chosasinthika ndi kukhulupirika, munthu amakhululukidwa machimo ake;
    chifukwa cha kuopa Yehova munthu amapewa zoyipa.

⁷ Pamene makhalidwe a munthu akondweretsa Yehova,
    ngakhale adani ake amakhala naye mwa mtendere.

⁸ Kuli bwino kukhala ndi zinthu pangʼono zozipeza mwachilungamo,
    kusiyana ndi kukhala ndi zinthu zambiri zozipeza popanda chilungamo.

⁹ Mtima wa munthu umalingalira zochita,
    koma Yehova ndiye amakhazikitsa njira zake.

¹⁰ Mawu a mfumu ali ngati mawu ochokera kwa Mulungu;
    ndipo pakamwa pake sipalakwa poweruza mlandu.

¹¹ Miyeso ndi masikelo achilungamo zimachokera kwa Yehova;
    miyala yonse yoyesera ya mʼthumba anayipanga ndi Yehova.

¹² Kuchita zoyipa kumanyansa mafumu,
    pakuti chilungamo ndiye maziko a ufumu wake.

¹³ Mawu owona amakondweretsa mfumu.
    Iyo imakonda munthu woyankhula choonadi.

¹⁴ Ukali wa mfumu ndi mthenga wa imfa,
    koma munthu wanzeru amawupepesa ukaliwo.

¹⁵ Kuwala kwa nkhope ya mfumu kumapatsa moyo;
    ndipo kukoma mtima kwake kuli ngati mitambo ya mvula nthawi ya chilimwe.

¹⁶ Nʼkwabwino kwambiri kupeza nzeru kupambana golide.
    Kukhala womvetsa bwino zinthu nʼkwabwino kupambana ndi kukhala ndi siliva.

¹⁷ Msewu wa munthu wowongoka mtima umapewa zoyipa;
    wopenyetsetsa kumene akupita amasunga moyo wake.

¹⁸ Kunyada kumafikitsa ku chiwonongeko,
    ndipo munthu wodzikuza adzagwa.

¹⁹ Nʼkwabwino kukhala ndi mtima wodzichepetsa pakati pa anthu oponderezedwa,
    kusiyana ndi kugawana zolanda ndi anthu onyada.

²⁰ Munthu womvera malangizo zinthu zimamuyendera bwino,
    ndipo wodala ndi amene amadalira Yehova.

²¹ A mtima wanzeru amatchedwa ozindikira zinthu,
    ndipo mawu ake okoma amawonjezera nzeru.

²² Kumvetsa zinthu ndi kasupe wa moyo kwa iwo amene ali nako,
    koma uchitsiru umabweretsa chilango kwa zitsiru.

²³ Mtima wanzeru umathandiza munthu kuyankhula mwa nzeru,
    ndipo mawu ake amawonjezera nzeru.

²⁴ Mawu okometsera ali ngati chisa cha njuchi,
    amakoma mu mtima ndipo amalimbitsa thupi.

²⁵ Pali njira ina yooneka ngati yowongoka kwa munthu
    koma kumatsiriziro kwake ndi imfa.

²⁶ Njala ya munthu wantchito imamuthandiza kulimbikira;
    njalayo imamukakamiza kuchitapo kanthu.

²⁷ Munthu wopanda pake amakonzekera kuchita zoyipa
    ndipo mawu ake ali ngati moto wopsereza.

²⁸ Munthu woyipa mtima amayambitsa mikangano,
    ndipo miseche imalekanitsa anthu okondana kwambiri.

²⁹ Munthu wandewu amakopa mnansi wake,
    ndipo amamuyendetsa njira imene si yabwino.

³⁰ Amene amatsinzinira maso ake amalingalira zinthu zokhota;
    amene amachita msunamo amakonzeka kuchita zoyipa.

³¹ Imvi zili ngati chipewa chaufumu chaulemerero;
    munthu amazipeza akakhala moyo wolungama.

³² Munthu wosapsa mtima msanga amaposa munthu wankhondo,
    munthu wowugwira mtima wake amaposa amene amalanda mzinda.

³³ Maere amaponyedwa pa mfunga,
    koma ndiye Yehova amene amalongosola zonse.