Nahumu 2

Mawu a Mulungu mu Chichewa Chalero

³ Zishango za ankhondo ake ndi zofiira;
    asilikali ake avala zovala zofiirira.
Zitsulo za pa magaleta zikunyezimira
    tsiku la kukonzekera kwake.
    Akuonetsa mikondo ya mkungudza yonoledwa.
⁴ Magaleta akuthamanga mʼmisewu
    akungothamangathamanga pa mabwalo.
Akuoneka ngati miyuni yoyaka;
    akuthamanga ngati chingʼaningʼani.

⁵ Iye akuyitanitsa asilikali ake wolemekezeka,
    koma iwo akubwera napunthwa.
Akuthamangira ku linga la mzinda;
    akuyimika chodzitchinjirizira pamalo pake.
⁶ Atsekula zipata zotchinga madzi a mu mtsinje
    ndipo nyumba yaufumu yagwa.
⁷ Zatsimikizika kuti mzinda
    utengedwa ndi kupita ku ukapolo.
Akapolo aakazi akulira ngati nkhunda
    ndipo akudziguguda pachifuwa.
⁸ Ninive ali ngati dziwe,
    ndipo madzi ake akutayika.
Iwo akufuwula kuti, “Imani! Imani!”
    Koma palibe amene akubwerera.
⁹ Funkhani siliva!
    Funkhani golide!
Katundu wake ndi wochuluka kwambiri,
    chuma chochokera pa zinthu zake zamtengowapatali!
¹⁰ Iye wawonongedwa, wafunkhidwa ndipo wavulidwa!
    Mitima yasweka, mawondo akuwombana,
    anthu akunjenjemera ndipo
    nkhope zasandulika ndi mantha.

¹¹ Kodi tsopano dzenje la mikango lili kuti,
    malo amene mikango inkadyetserako ana ake,
kumene mkango waumuna ndi waukazi unkapitako,
    ndipo ana a mkango sankaopa kanthu kalikonse?
¹² Mkango waumuna unkapha nyama yokwanira ana ake
    ndiponso kuphera nyama mkango waukazi,
kudzaza phanga lake ndi zimene wapha
    ndiponso dzenje lake ndi nyama imene waphayo.

¹³ Yehova Wamphamvuzonse akuti,
    “Ine ndikutsutsana nawe.
Ndidzatentha magaleta ako mpaka utsi tolotolo,
    ndipo lupanga lidzapha mikango yako yayingʼono;
sindidzakusiyira chilichonse choti udye pa dziko lapansi.
Mawu a amithenga anu sadzamvekanso.”