Nnwom 103

Nkwa Asem

Onyankopɔn dɔ

103 Me kra kamfo Awurade! Na me mu ade nyinaa nkamfo ne din kronkron no. ² Me kra kamfo Awurade, na mma me werɛ mmfi ne nneyɛe pa nyinaa.

³ Ɔno na ɔde me mfomso nyinaa firi me, na ɔsa me nyarewa nyinaa. ⁴ Ogye me nkwa fi damoa mu na ɔde adɔe ne mmɔborɔhunu bɔ me abotiri. ⁵ Ɔma me m’asetena mu nnepa na matena ase frɔmm ne ahoɔden so sɛ ɔkɔre. ⁶ Awurade bu wɔn a wɔhyɛ wɔn so bem na ɔma wɔn wɔn kyɛfa. ⁷ Ɔkyerɛɛ Mose ne nhyehyɛe, na ɔmaa Israelfo huu nneɛma akɛse a wayɛ.

⁸ Mmɔborɔhunufo ne ɔdomfo ne Awurade, ne bo kyɛ fuw na n’adɔe dɔɔso. ⁹ Ɔrenkɔ so nka anim na ne bo mfuw daa nyinaa. ¹⁰ Ontua yɛn ka sɛnea ɛfata yɛn, anaasɛ ontua yɛn bɔne ne yɛn mfomso so ka. ¹¹ Na sɛ ɔsoro ware sen asase no, sɛ n’adɔe so wɔn a wosuro no so ne no. ¹² Sɛ apuei ne atɔe ntam ware no, sɛ wama yɛn ne yɛn mmarato ntam aware ne no. ¹³ Sɛ agya yam hyehye no ne mma ho no, sɛ Awurade yam yɛ no wɔ wɔn a wodi no ni ho ne no. ¹⁴ Onim nea wɔde yɛɛ yɛn; ɔkae sɛ yɛyɛ mfutuma. ¹⁵ Ɔdasani de, ne nna te sɛ sare, ɔyɛ frɔmm sɛ wuram nhwiren. ¹⁶ Sɛ mframa bɔ fa ne so a, na onni hɔ, na ne sibere nnim no bio.

¹⁷ Na wɔn a wodi Awurade ni no, ne dɔ wɔ wɔn so daa daa na ne papayɛ wɔ hɔ ma nkyirimma ¹⁸ ne wɔn a wodi n’apam no ho nokware na wodi ne mmara so. ¹⁹ Awurade asi n’ahengua wɔ soro; ɔyɛ ade nyinaa so hene. ²⁰ Mo abɔfo atumfoɔ a mutie ne mmara na mutie nea ɔka no, monkamfo Awurade. ²¹ Mo ɔsoro atumfoɔ nyinaa ne mo a moyɛ n’asomfo na moyɛ n’apɛde no, monkamfo Awurade. ²² Abɔde a mowɔ baabiara a odi so no nyinaa, monkamfo Awurade. Me kra, kamfo Awurade!