Nnwom 30

Nkwa Asem

Aseda mpaebɔ

30 Mekamfo wo, Awurade, efisɛ, woagye me nkwa ayi me afi atamfo ani a ɛbere me no mu. ² Misu frɛɛ wo sɛ boa me, O Awurade, me Nyankopɔn, na wosaa me yare ³ yii me fii damoa no mu. Na anka meresian akɔ ase pɛɛ, nanso wosan maa me nkwa.

⁴ Monto ayeyi nnwom mma Awurade; mo a mudi no nokware nyinaa! Monkae nea Kronkronni no ayɛ, na monna no ase! ⁵ N’abufuw nkyɛ, na ne papayɛ wɔ hɔ nkwa nna nyinaa. Nusu begu anadwo, nanso ahosɛpɛw bɛba anɔpa.

⁶ Minyaa ogye nti mekae se, “Wɔrenni me so da.” ⁷ Woyɛɛ me yiye, Awurade; wobɔɔ me ho ban sɛ abankɛse, nanso wode wo ho siee me ma misuroe. ⁸ Mefrɛɛ wo, Awurade, srɛɛ wo mmoa. ⁹ Mfaso bɛn na wubenya wɔ me wu ho? Na sɛ mekɔ damoa mu a, wunya dɛn? Awufo betumi akamfo wo? Wobetumi apae mu aka wo papayɛ? ¹⁰ Tie me, Awurade, na hu me mmɔbɔ! Boa me, Awurade!” ¹¹ Woama m’awerɛhow adan anigye asaw; woafa m’awerɛhow ma anigye atwa me ho ahyia. ¹² Enti merenyɛ komm. Mɛto dwom akamfo wo. Awurade, woyɛ me Nyankopɔn. Mɛda wo ase daa daa.