2 Aun daem Enjel fonn dee Jemeent enn Efeesus, schriew: Dit sajcht dee, dee de saewen Stearns enn siene rajchte Haunt helt, dee mank dee saewen goldene Laumpahoole romjeit:

² "Ekj weet diene Woakje, en diene Oabeit, en diene Jedult, en daut du dee beese Mensche nich fedroage kaunst, en daut du daen utjeprooft hast dee sikj Apostel nande, oba nich sent, en hast utjefunge daut see Laeajna sent;

³ en hast Jedult jehaut, en hast utjehoole waeajen mien Nome, en best nich Meed jeworde.

⁴ Oba ekj ha dit jaeajen die, daut du diene easchte Leew felote hast.

⁵ Doaromm denkj doaraun fonn wua du jefolle best, en doo Buesse, en doo dee Woakje dee du em Aunfank deetst; en wan nich, dan woa ekj kome en dien Laumpahoola fonn siene Staed wajch naeme, wan du nich Buesse deist.

⁶ Oba dit hast du, daut du dee Nikolaiten aeare Woakje hause deist, dee ekj uk haus.

⁷ Waea en Ua haft tom heare, lot am heare waut dee Jeist to dee Jemeente sajcht. Waea uthelt en jewent woa ekj to aete jaewe fonn daem Laewesboom, dee medd enn Gott sien Paradies steit.

⁸ Aun daem Enjel fonn dee Jemeent enn Smierna, schriew: Dit sajcht dee Easchta en dee Latsta, dee doot wea, en nu wada laeft:

⁹ Ekj weet woo du liede deist, en woo Oam du best, [oba du best Rikj] - en daut Lastre fonn daen, dee sikj selfst Jude nane, en daut nich sent, oba sent daem Soton siene Sienagoog.

¹⁰ Engst die nich aewa daut waut du em korte liede woascht. Kjikj! De Diewel woat boolt walkje fonn junt emm Jefenknes stoppe omm junt oppe Proow to stale, en jie woare tean Doag liede. Blieft Tru bottem Doot, en ekj woa junt ne Laeweskroon jaewe.

¹¹ Waea en Ua haft, lot am heare waut dee Jeist to dee Jemeente sajcht. Waea uthelt en jewent woat fonn daem tweede Doot kjeen Schode liede.

¹² Aun daem Enjel fonn dee Jemeent enn Pergamus, schriew: Dit sajcht dee, dee daut schoapet, dobbelt schniedendet Schweat haft:

¹³ Ekj weet wua du wonst; wua daem Soton sien Troon es; en du heslt mien Nome faust, en hast dien Gloowe nich aufjesajcht, sogoa enn dee Doag aus Antipas, mien Truehe Zeij, mank junt doot jemoakt wort, wua dee Soton wont.

¹⁴ Oba ekj ha en poa Dinje jaeajen die, wiel du doa soone hast dee daem Bieliam siene Lea fausthoole, dee Barak lead fer dee Iesrael Saens en Stollpaklotts faea to schmiete, daut see Jetseopfa aete sulle, en Huararie dreewe.

¹⁵ En du hast uk soone doa dee sikj aun dee Nikolaiten aeare Lea hoole.

¹⁶ Doaromm doo Buesse. Wan nich, dan woa ekj haustich kome met daut Schweat ut mien Mul, en jaeajen an kjrieje.

¹⁷ Waea en Ua haft tom heare, lot am heare waut dee Jeist to dee Jemeente sajcht. Waea uthelt en jewent, woat ekj to aete jaewe fonn festoaknet Mana, en woa am en witta Steen jaewe, en opp daen Steen en Nome jeschraewe daen sest kjeena weete kaun bute dee, dee daen kjriehe woat.

¹⁸ Aun daem Enjel fonn dee Jeement enn Tiatiera schriew: Dit sajcht dee Gottesaen, daem siene Uage soo aus ne Fiaflaum sent, en siene Feet soo aus blanket Mesinj: Ekj weet omm diene Woakje, en diene Leew, en dien Gloowe, en dien Deenst, en diene Jedullt, en daut latste meeha auset easchte.

²⁰ Oba ekj ha dit jaeajen die, daut du dee Fru Iesebel, dee sikj selfst en Profeet nant, toch latst, en see leat en fefeat miene Sklowe Huararie to driewe, en Jetseopfa to aete.

²¹ Ekj ha aea Tiet jejaeft Buesse to doone, oba see wel aewa aeare Huararie nich Buesse doone.

²² Kjikjt, ekj woa aea enn en Bad enenn schmiete, en daen dee met aea ha Huararie jedraewe, enn groote Triebsaul enenn, buta wan see Buesse woare doone fonn aeare Woakje.

²³ En ekj woa aeare Kjinje metem Doot dootmoake, en dan woare dee Jemeente weete daut ekj dee sie, dee Hoate en Jedanke utforscht, en woa en jieda eenem no siene Woakje beloone.

²⁴ Oba to dee aundre enn Tiatiera, dee dise Lea nich ha aunjenome, en dee sikj nich met daut Deepe fonn daem Soton aufjejaeft ha, soo aus see saje; woa ekj kjeene jratre Laust opplaje.

²⁵ Trotsdaem, hoolt daut faust waut jie ha bott ekj kom.

²⁶ En waeaemma jewent, en miene Woakje bottem Enj helt, woa ekj Follmacht jaewe aewe dee Natsjoone,

²⁷ en hee woat aewa an harsche met ne Iesastang, soo aus Leemtapp to Bieta jeschloage woare;

²⁸ soo aus ekj fonn mien Foda jekjraeaje ha, en ekj woa am daen Morjestearn jaewe.

²⁹ Waea en Ua haft tom heare, lot am heare waut dee Jeist dee Jemeente to saje haft."