13 “Laba, eriiso lyange lyalaba ebyo byonna,
    n’okutu kwange ne kuwulira ne mbitegeera.
^2 (A)Kye mumanyi nange kye mmanyi;
    siri wa wansi ku mmwe.
^3 (B)Naye neegomba okwogera n’oyo Ayinzabyonna,
    era n’okuleeta ensonga zange mu maaso ga Katonda.
^4 (C)Naye mmwe mumpayiriza;
    muli basawo abatagasa mmwe mwenna!
^5 (D)Kale singa musirika!
    Olwo lwe mwandibadde n’amagezi.
⁶ Muwulire kaakano endowooza yange,
    muwulirize okwegayirira kw’emimwa gyange.
^7 (E)Katonda munaamwogerera nga mwogera ebitali bya butuukirivu?
    Munaamwogerera eby’obulimba?
^8 (F)Munaamulaga ng’ataliiko luuyi,
    munaamuwoleza ensonga ze.
^9 (G)Singa akukebera, anaakusanga oli bulungi?
    Oyinza okumulimba nga bw’oyinza okulimba abantu?
¹⁰ Tayinza butakunenya,
    singa osaliriza mu bubba.
^11 (H)Ekitiibwa kye ekisukiridde tekyandikutiisizza?
    Entiisa ye teyandikuguddeko?
¹² Ebigambo byammwe ebijjukirwa ngero za vvu,
    n’okwewolereza kwammwe kwa bbumba.
¹³ Musirike nze njogere;
    kyonna ekinantukako kale kintuukeko.
¹⁴ Lwaki neeteeka mu mitawaana,
    obulamu bwange ne mbutwalira mu mikono gyange?
^15 (I)Ne bw’anzita, mu ye mwe nnina essuubi,
    ddala ddala nditwala ensonga zange mu maaso ge.
^16 (J)Ddala kino kinaavaamu okusumululwa kwange,
    kubanga teri muntu atatya Katonda ayinza kwetantala kujja mu maaso ge!
^17 (K)Muwulirize ebigambo byange n’obwegendereza;
    amatu gammwe gawulire bye ŋŋamba.
^18 (L)Kaakano nga bwe ntegese empoza yange,
    mmanyi nti nzija kwejeerera.
^19 (M)Waliwo ayinza okuleeta emisango gye nvunaanibwa?
    Bwe kiba bwe kityo, nzija kusirika nfe.
²⁰ Ebintu ebyo ebibiri byokka by’oba ompa, Ayi Katonda,
    awo sijja kukwekweka.
^21 (N)Nzigyako omukono gwo,
    olekere awo okuntiisatiisa n’okunkangakanga.
^22 (O)Kale nno ompite nzija kukuddamu,
    oba leka njogere ggwe onziremu.
^23 (P)Nsobi meka era bibi bimeka bye nkoze?
    Ndaga ekibi kyange era n’omusango gwange.
^24 (Q)Lwaki okweka amaaso go,
    n’onfuula omulabe wo?
^25 (R)Onoobonyaabonya ekikoola ekifuuyiddwa omuyaga?
    Onooyigga ebisasiro ebikaze?
^26 (S)Kubanga ompadiikako ebintu ebiruma,
    n’ondeetera okuddamu okwetikka ebibi byange eby’omu buvubuka.
^27 (T)Oteeka ebigere byange mu nvuba,
    era okuuma butiribiri amakubo gange mwe mpita
    ng’oteeka obubonero ku bisinziiro by’ebigere byange.
^28 (U)Bw’atyo omuntu bw’aggwaawo ng’ekintu ekivundu,
    ng’olugoye oluliiriddwa ennyenje.”