Yobu 24

Mawu a Mulungu mu Chichewa Chalero

24 “Chifukwa chiyani Wamphamvuzonse sayikiratu nthawi yoti aweruze?
    Chifukwa chiyani iwo amene amadziwa Iyeyo amayembekezera pachabe masiku oterewa?
² Anthu amasuntha miyala ya mʼmalire, kuti akuze dziko lawo;
    amadyetsa ziweto zimene aba.
³ Amalanda abulu a ana amasiye
    ndipo amatenganso ngʼombe ya mkazi wamasiye ngati chikole.
⁴ Amachotsa mʼmisewu anthu osauka,
    ndipo amathamangitsa amphawi onse mʼdziko.
⁵ Amphawiwo amakhala ngati mbidzi mʼchipululu,
    amayendayenda kufuna chakudya;
    dziko lowuma limapereka chakudya cha ana awo.
⁶ Iwo amakolola za mʼminda ya eni ake,
    ndipo amakunkha mphesa mʼminda ya anthu oyipa.
⁷ Amagona maliseche usiku wonse kusowa zovala;
    pa nthawi yozizira amasowa chofunda.
⁸ Amavumbwa ndi mvula ya mʼmapiri
    ndipo amakangamira ku matanthwe kusowa pobisalapo.
⁹ Amatsomphola mwana wamasiye wa ku bere;
    ndipo amagwira mwana wakhanda wa mʼmphawi kuti akhale chikole.
¹⁰ Amphawi amangoyenda maliseche kusowa zovala;
    amasenza mitolo ya tirigu, koma nʼkumagonabe ndi njala.
¹¹ Iwo amayenga mafuta a olivi mʼminda ya anthu oyipa;
    amapsinya mphesa, koma nʼkumamvabe ludzu.
¹² Kubuwula kwa anthu amene akufa kumamveka kuchokera mu mzinda,
    anthu ovulala akulirira chithandizo.
    Koma Mulungu sakuyimba mlandu wina aliyense.

¹³ “Pali ena amene amakana kuwala,
    amene safuna kuyenda mʼkuwalako
    kapena kukhala mʼnjira zake.
¹⁴ Dzuwa likalowa, wopha anzake amadzuka
    ndipo amakapha osauka ndi amphawi;
    nthawi ya usiku iye amasanduka mbala.
¹⁵ Munthu wachigololo amadikira chisisira;
    iyeyo amaganiza kuti, ‘Palibe amene akundiona,’
    ndipo amaphimba nkhope yake.
¹⁶ Mbala zimathyola nyumba usiku,
    koma masana zimadzitsekera;
    izo zimathawa kuwala.
¹⁷ Pakuti kwa onsewa mdima wandiweyani ndiye kuti kwawachera.
    Iwo amachita ubale ndi zoopsa za mdima.

¹⁸ “Komatu iwowo ndi thovu loyandama pa madzi;
    minda yawo ndi yotembereredwa pa dzikolo
    kotero kuti palibe amene amapita ku minda ya mpesa.
¹⁹ Monga momwe kutentha ndi chilala zimasungunulira madzi owundana
    ndi momwemonso mmene manda amachotsera omwe achimwa.
²⁰ Mayi wowabereka amawayiwala,
    mphutsi zimasangalala powadya;
anthu oyipa sakumbukiridwanso
    koma amathyoka ngati mtengo.
²¹ Amachitira nkhanza mayi wosabala ndi mayi amene alibe mwana,
    ndipo sakomera mtima mkazi wamasiye.
²² Koma Mulungu amawononga munthu wamphamvu mwa mphamvu zake;
    ngakhale munthuyo atakhazikika, alibe chiyembekezo cha moyo wake.
²³ Mulungu atha kuwalola kuti akhale mosatekeseka,
    koma amakhala akupenyetsetsa njira zawo.
²⁴ Kwa kanthawi kochepa oyipa amakwezedwa ndipo kenaka saonekanso;
    amatsitsidwa ndipo amachotsedwa monga ena onse;
    amadulidwa ngati ngala za tirigu.

²⁵ “Ngati zimenezi sizoona, ndani angaonetse kuti ndine wabodza
    ndi kusandutsa mawu anga kukhala wopanda pake?”