Isaiah 40

Bíbélì Mímọ́ Yorùbá Òde Òn

^3 (A)Ohùn ẹni tí ń kígbe ní ijù:
    “Ẹ tún ọ̀nà Olúwa ṣe,
    ṣe òpópó tí ó tọ́ ní aginjù fún Ọlọ́run wa.
^4 (B)Gbogbo Àfonífojì ni a ó gbé sókè,
    gbogbo òkè ńlá àti òkè kékeré ni yóò di pẹ̀tẹ́lẹ̀;
wíwọ́ ni a ó sọ di títọ́ àti
    ọ̀nà pálapàla ni a óò sọ di títẹ́jú pẹrẹsẹ,
⁵ Ògo Olúwa yóò sì di mí mọ̀
    gbogbo ènìyàn lápapọ̀ ni yóò sì rí i.
    Nítorí ẹnu Olúwa ni ó ti sọ ọ́.”

^6 (C)Ohùn kan wí pé, “Kígbe sókè.”
    Èmi sì sọ pé, “Igbe kí ni èmi ó ké?”

“Gbogbo ènìyàn dàbí i koríko,
    àti gbogbo ògo wọn dàbí ìtànná igbó.
⁷ Koríko ń rọ ìtànná sì ń rẹ̀,
    nítorí èémí Olúwa ń fẹ́ lù wọ́n.
    Nítòótọ́ koríko ni àwọn ènìyàn.
⁸ Koríko ń rọ ìtànná sì ń rẹ̀,
    ṣùgbọ́n ọ̀rọ̀ Ọlọ́run wa dúró títí láé.”

^9 (D)Ìwọ tí o mú ìyìn ayọ̀ wá sí Sioni,
    lọ sí orí òkè gíga.
Ìwọ tí ó mú ìyìn ayọ̀ wá sí Jerusalẹmu,
    gbé ohùn rẹ sókè pẹ̀lú ariwo,
gbé e sókè, má ṣe bẹ̀rù;
    sọ fún àwọn ìlú u Juda,
    “Ọlọ́run rẹ nìyìí!”
^10 (E)Wò ó, Olúwa Olódùmarè náà ń bọ̀ wá pẹ̀lú agbára,
    apá rẹ̀ sì ń jẹ ọba fún un.
Wò ó, èrè rẹ̀ sì wà pẹ̀lú rẹ̀,
    àti ìdápadà rẹ̀ tí ń bá a bọ̀ wá.
¹¹ Ó ń tọ́ àwọn agbo rẹ̀ gẹ́gẹ́ bí olùṣọ́-àgùntàn:
    Ó kó àwọn ọ̀dọ́-àgùntàn ní apá rẹ̀.
Ó sì gbé wọn súnmọ́ oókan àyà rẹ̀;
    ó sì fi pẹ̀lẹ́pẹ̀lẹ́ darí àwọn tí ó ní.

¹² Ta ni ó tiwọn omi nínú kòtò ọwọ́ rẹ̀,
    tàbí pẹ̀lú ìbú ọwọ́ rẹ̀
tí ó wọn àwọn ọ̀run?
    Ta ni ó ti kó erùpẹ̀ ilẹ̀ ayé jọ nínú apẹ̀rẹ̀,
tàbí kí ó wọn àwọn òkè ńlá lórí ìwọ̀n
    àti òkè kéékèèkéé nínú òṣùwọ̀n?
^13 (F)Ta ni ó ti mọ ọkàn Olúwa,
    tàbí tí ó ti tọ́ ọ ṣọ́nà gẹ́gẹ́ bí olùdámọ̀ràn rẹ̀?
¹⁴ Ta ni Olúwa ké sí kí ó là á lọ́yẹ
    àti ta ni ó kọ́ òun ní ọ̀nà tí ó tọ́?
Ta ni ẹni náà tí ó kọ́ ọ ní ọgbọ́n
    tàbí tí ó fi ipa ọ̀nà òye hàn án?

¹⁵ Nítòótọ́ àwọn orílẹ̀-èdè dàbí i ẹ̀kún omi
    nínú garawa;
a kà wọ́n sí gẹ́gẹ́ bí eruku lórí ìwọ̀n;
    ó wọn àwọn erékùṣù àfi bí eruku múnúmúnú ni wọ́n.
¹⁶ Lebanoni kò tó fún pẹpẹ iná,
    tàbí kí àwọn ẹranko rẹ̀ kí ó tó fún ẹbọ sísun.
¹⁷ Níwájú rẹ̀ ni gbogbo orílẹ̀-èdè dàbí ohun tí kò sí;
    gbogbo wọn ló kà sí ohun tí kò wúlò
    tí kò tó ohun tí kò sí.

¹⁸ Ta ni nígbà náà tí ìwọ yóò fi Ọlọ́run wé?
    Ère wo ni ìwọ yóò fi ṣe àkàwé rẹ̀?
¹⁹ Ní ti ère, oníṣọ̀nà ni ó dà á,
    ti alágbẹ̀dẹ wúrà sì fi wúrà bò ó
    tí a sì ṣe ẹ̀wọ̀n ọ̀nà sílífà fún un.
²⁰ Ọkùnrin kan tí ó tálákà jù kí ó lè mú
    irú ọrẹ bẹ́ẹ̀ wá,
wá igi tí kò le è rà.
    Ó wá oníṣọ̀nà tí ó
    láti ṣe àgbékalẹ̀ ère tí kì yóò le è ṣubú.

²¹ Ǹjẹ́ o kò tí ì mọ̀
    ìwọ kò tí ì gbọ́?
A kò tí ì sọ fún ọ láti ìbẹ̀rẹ̀ wá?
    Ìwọ kò tí ì mọ láti ìgbà ìpìlẹ̀ ayé?
²² Òun jókòó lórí ìtẹ́ ní òkè òbírí ilẹ̀ ayé,
    àwọn ènìyàn rẹ̀ sì dàbí i láńtata.
Ó ta àwọn ọ̀run bí ìbòrí ìgúnwà,
    ó sì nà wọ́n jáde gẹ́gẹ́ bí àgọ́ láti gbé.
²³ Ó sọ àwọn ọmọ ọba di asán
    àti àwọn aláṣẹ ayé yìí ni ó ti sọ dòfo.
²⁴ Gẹ́rẹ́ tí a ti gbìn wọ́n,
    kété tí a gbìn wọ́n,
kété tí wọ́n fi gbòǹgbò múlẹ̀,
    bẹ́ẹ̀ ni ó fẹ́ atẹ́gùn lù wọ́n gbogbo wọn sì gbẹ,
    bẹ́ ni ìjì líle sì gbá wọn lọ gẹ́gẹ́ bí ìyàngbò.

²⁵ “Ta ni ẹ ó fi mi wé?
    Tàbí ta ni ó bá mi dọ́gba?” ni Ẹni Mímọ́ wí.
²⁶ Gbé ojú rẹ sókè kí o sì wo àwọn ọ̀run:
    Ta ni ó dá àwọn wọ̀nyí?
Ẹni tí ó mú àkójọpọ̀ àwọn ìràwọ̀ jáde wá ní ọ̀kọ̀ọ̀kan
    tí ó sì pè wọ́n ní orúkọ lọ́kọ̀ọ̀kan.
Nítorí agbára ńlá àti ipá rẹ̀,
    ọ̀kan ṣoṣo nínú wọn kò sọnù.

²⁷ Èéṣe tí o fi sọ, ìwọ Jakọbu
    àti tí o ṣàròyé, ìwọ Israẹli;
“Ọ̀nà mi pamọ́ níwájú Olúwa;
    ìṣe mi ni a kò kọbi ara sí
    láti ọwọ́ Ọlọ́run mi”?
²⁸ Ìwọ kò tí ì mọ̀?
    Ìwọ kò tí ì gbọ́?
Olúwa òun ni Ọlọ́run ayérayé,
    Ẹlẹ́dàá gbogbo ìpẹ̀kun ilẹ̀ ayé.
Agara kì yóò da bẹ́ẹ̀ ni kò ní ṣàárẹ̀,
    àti òye rẹ̀ ni ẹnikẹ́ni kò le ṣe òdínwọ̀n rẹ̀.
²⁹ Ó ń fi agbára fún àwọn aláàárẹ̀
    ó sì fi kún agbára àwọn tí agara dá.
³⁰ Àní, ó ń rẹ̀ wọ́n àwọn ọ̀dọ́, wọ́n ń rẹ̀wẹ̀sì,
    àwọn ọ̀dọ́mọkùnrin sì ń kọsẹ̀ wọ́n ṣubú;
³¹ ṣùgbọ́n àwọn tí ó gbẹ́kẹ̀lé Olúwa
    yóò sọ agbára wọn di ọ̀tun.
Wọn yóò fìyẹ́ fò lókè bí idì;
    wọn yóò sáré àárẹ̀ kò ní mú wọn,
    wọn yóò rìn òòyì kò ní kọ́ wọn.